اسلام آباد ۔ 24 دسمبر (اے پی پی) چیئرمین سینٹ میاں رضا ربانی آکھیے جوامریکا پاکستان دیاں قربانیاں نظر انداز کریندا پئے،خطے اچ اسرائیل،امریکا اتے بھارت دا نواں گٹھ جوڑ بنڑدا پئے،سپرپاور مشرق وسطیٰ دے توانائی ذخائرتے کنٹرول چاہندی اے جیکرایشیاءاپنڑی قسمت دا آپ فیصلہ کنہ کیتا تاں تاریخ معاف نہ کریسی۔اسلام آباد اچ پہلی چھی ملکی علاقائی سپیکرز کانفرنس نال خطاب اچ چیئرمین سینیٹ دا آکھنڑ ہا جو امریکی پالیسی اچ جیہڑے چیلنجاں دا سامنڑاں اے اوندے مطابق روس ،چین ،ایران ،شمالی کوریا اتے جہادی گروپس سب توں وڈے چیلنج گنڑیے گن، نویں منظر نامے اچ امریکا، بھارت اتے اسرائیل دا گٹھ جوڑ سامنڑے آندا پئے، اے گٹھ جوڑ عالمی امن اتے دہشتگردی دے خلاف کوششاں کیتے نقصان دہ ثابت تھیسی۔انہاں آکھیے جو افغانستان اچ ناکامی دی ذمہ داری پاکستان دے سِر سٹی ویندی پئی اے،بھارت امریکا کوں خطے دا تھانڑیندار بنڑایندا پئے جیہڑا اصلوں قبول کائنی، پاکستان ہک آزاد اتے خود مختار ملک اے جیکوں کہیں توں ڈکٹیشن گھنڑ دی لوڑھ نئیں۔پاکستان اپنڑی سالمیت تے کوئی سمجھوتہ نہ کریسی۔رضا ربانی آکھیے جو امریکا دامقبوضہ بیت المقدس دے حوالے نال فیصلہ حیران کن اے جیکون دنیا نئیں منیا اتے جنرل اسمبلی اچ امریکا کوں ایندا جواب وی مل گئے۔انہاں زور ڈتے جو ساکوں صورتھال تے یرغمال بنڑن دی بجائے مشترکہ حکمت عملی اختیار کرنڑی ہوسی، سی پیک اتے ون بیلٹ ون روڈ اقدام کوں اگو تے ٹورڑان ہوسی تاں جو ایشیا دی سماجی اتے اقتصادی ترقی یقینی بنڑائی ونج سگے۔انہان آکھیے جیکرایشیاءاپنڑی قسمت دا آپ فیصلہ کنہ کیتا تاں تاریخ معاف نہ کریسی۔
