اسلام آباد ۔ 02 دسمبر (اے پی پی)صدر مملکت ممنون حسین آکھیا ہو جو نبی آخرالزماں حضرت محمد تے ڈھگ سارے درود وسلام تھیونڑ اتے شکر ہے جو اللہ سائیں دی ذات دا جیں اپنڑے لطف و کرم نال اساکوںحضور دا اُمتی بنڑا تے اساڈی دنیا تے آخرت سنوارنڑ دا ذریعہ فراہم کیتا۔حضور دی جمنڑے دا مبارک ڈینھ ہے اتے ایں برکت نال انہاں دی لافانی تعلیمات داعلم حاصل کر تے انہاں تے سچے دل نال عمل دا وعدہ کرنڑ دی ضرورت ہے۔ ہفتے کوں اتھاں کنونشن سینٹر وچ بین الاقوامی سیرت النبی کانفرنس دا انعقاد کیتا گیا جیندا موضوع ” اسلامی ریاست وچ قومی قیادت دے رہنما اصول تعلیمات نبوی دی روشنی وچ “ ہا ۔ کانفرنس توںخطاب کریندے ہوئیں صدر مملکت آکھیا جو جڈاں اہل وطن نبی رحمت دے جمنڑے دے ڈینھ دا جشن منیندے پن اتے انہاں دے دسائے ہوئے پاکیزہ طریقیاں تے چلنڑ دا وعدہ پورا کریندے پئے ہن ایجھے ویلھے بد بختاںپشاور وچ معصوم لوکیں دے رت وچ نوا ڈتا ۔حضور دیاں تعلیمات تے یقین رکھنڑ آلے کڈاہیں وی ایجھا کم نی کرسگدے۔ انہاں آکھیا جوشدت پسندی ایجھاناسور ہے جیرھا ملکی استحکام سانگے خطرہ ہے لہذایندے نال نبڑن سانگے قوم دا ہک مٹھ تھیونڑ ضروری ہے ۔انہاں آکھیا جوکجھ عرصے پہلے انٹر نیشنل اسلامک یونیورسٹی وچ علماءانتہا پسندی اتے تشدد دے حوالے نال ہک سانجھا اعلامیہ جاری کیتاہاجیرھا ہک چنگی کوشش ہے ۔ انہاں آکھیا جو اساں ساریاں کوں رل مل تے دہشتگردی دے خلاف قومی بیانیہ تشکیل ڈیونڑ چاہیدے۔ انہاں آکھیا جوحضورﷺ دے معیارزندگی کوںاختیار کر تے پوری دنیا وچ اج وی امن ، ترقی اتے خوشحالی میسر آسدگی ہے ۔ صدر مملکت آکھیا جو سرور کائناتﷺ دی زندگی تے غور کروں تاںپتہ چلدے جو دل تے نظراں دی پاکی حضور ﷺ دے طریقے تے زندگی گزرانڑ وچ ہے۔انہاں آکھیا آپ دی زندگی دے ترائے بنیادی اوصاف ہن جنہاں وچ اج دے مسئلیاںدا حل موجود ہے ۔ انہاں آکھیا جو حضور دے نقش قدم تے چلدے ہوئیں صرف اللہ دی رضا سانگے ایندے بندیان نال پیار اتے انہاں دی خیر منگنڑ دا معاملہ پیش نظر رکھنڑ دی ضرورت ہے ۔ انہاں کانفرنس دے انعقاد تے وزارت مذہبی امور تے بین المذاہب و ہم آہنگی ، سیرت النبیﷺ دے مصنفاں اتے بئے شرکاءکوں مبارخ ڈتی اتے دعا کیتی جو اللہ سائیں انہاں دی اتے اساڈیاں کاوشاں قبول کرے اتے آقائے نامدارﷺ دے ڈسے ہوئے رستے تے چلنڑ دی توفیق عطاءفرماوے۔
