اسلام آباد ۔ 24 جنوری (اے پی پی) صدر ممنون حسین جدید ترین اردو لغت دے آئن لائن ایڈیشن داباضابطہ افتتاح کرڈتا ہے۔ ایں سلسلہ اچ بدھ دے ڈینھ ایوان صدر اچ وڈی پروقار تقریب منعقد تھئی ۔تقریب اچ وزیراعظم دے مشیر برائے قومی تریخ تے ادبی ورثہ عرفان صدیقی، سیکرٹری قومی تریخ تے ادبی ورثہ عامر حسن، اردو لغت بورڈ دے چیف ایڈیٹر عقیل عباس جعفری سمیت ودھ ساریاں ماہر لسانیات اتے ادبی شخصیات شرکت کیتی۔ کئی عشراں دی محنت نال تیار تھیونڑ آلی 22 جلداں تے مشتمل اردو لغت دے آن لائن ایڈیشن دے ذریعے نال22 ہزار صفحات تقریباً 2 لکھ 64 ہزار لفظاں تے مشتمل علمی خزانہ ہنڑ انٹرنیٹ تے دستیاب ہو سی جیندے کیتے مخصوص “ایپ” تیار کیتی گئی ہے۔ تقریب نال خطاب کریندے ہوئیں صدر مملکت ممنون حسین آکھیا جو ایہ تقریب کئی لحاظ نال یادگار اہمیت دی حامل ہے ، اج اساڈی زبان تہذیبی طور تے وڈی عالمی زباناں دی صف اچ شامل تھی گئی ہے۔ انہاں وزیر اعظم دے مشیر عرفان صدیقی اتے انہاں دی ٹیم کوں ایں شاندار کامیابی تے مبارخباد ڈیندے ہوئیں توقع ظاہر کیتی جوکامیابیاں دا ا یہ سفرمستقبل اچ وی جاری راہسی اتے ادب تے ثقافت داا یہ جھنڈا پوری دنیا اچ آب و تاب نال اچاراہسی۔ صدر مملکت آکھیا جوزباناں انسان دی سنجانڑ اتے رابطے دا ذریعہ ہندیاں ہن ، خوشی ہے جو 22جلداںتے مشتمل اردو لغت اردو زبان دے ساریاںنزاکتاں اتے ثقافتی تریخ کوں سامنڑے گھن تے آئی ہے۔ انہاں آکھیا جو اپنڑی ثقافت پکی ہوئے تاں باہرلیاں ثقافتاں دی یلغار دا کوئی خطرہ نی ہوندا۔ صدر مملکت آکھیا جو قومی زبان دے خادم تے محسن لوکاں کوں محبت نال یاد کیتا ویندے۔ انہاں خواہش دا اظہار کیتا جو اردو لغت اچ استعمال تھیونڑ آلے ادبی خزینے کوں محفوظ کرگھدا ونجے۔ صدر ممنون حسین اردو زبان نال اپنڑے لگاﺅ اتے آذربائیجان دے دورے دا ذکر کریندے ہوئیں آکھیا جو انہاں اپنڑے دورے دے دوران آذربائیجان اچ اردو نال پیار کرنڑ آلیاں کوں اردو لغت داتحفہ پیش کیتا ہا۔ صدر مملکت آکھیا جواردو لغت صرف علمی سرگرمی ہی نی بلکہ ہک تحقیقی معاملہ وی ہے۔ انہاں امید ظاہر کیتی جو اردو لغت بورڈ ایں ضمن اچ چنگیاں کوششاںکریسی ،جیندے نال نہ صرف لغت بلکہ متعلقہ صنعت اچ وی صحت مند رجحان پیدا تھیسی اتے اساں اپنڑیاں مطبوعات بین الاقوامی مارکیٹ اچ چنگے انداز اچ متعارف کروا سگسوں۔ انہاں آکھیا جواردو لغت دے آن لائن ایڈیشن دے ذریعے پوری دنیا فائدہ چا سگدی ہے۔ انہاں آکھیا جوتوقع ہے جو وختی آن لائن ایڈیشن اچ صوتی اتے صحیح تلفظ وی میسر ہو سی۔ انہاں ایں گالھ تے زورڈتا جو بدلدے وقت دے نال نال زبان اچ وی جدیدیت دی ضرورت ہوندی ہے۔ امید ہے جو وقت دے نال نال بدلدے الفاظ اساڈی لغت اچ شامل تھی سگسن۔ صدر مملکت ایں موقع تے یقین ڈیوایا جوحکومت لغت دے حوالے نال کم کرنڑ آلیاں دیاں ضرورتاں پوریاں کریندی راہسی۔ تقریب توں وزیراعظم دے مشیر برائے قومی تریخ تے ادبی ورثہ عرفان صدیقی وی خطاب کیتا اتے اردو لغت دے آن لائن ایڈیشن دے اغراض و مقاصد اتے خصوصیات تے روشنی پاتی۔
