اسلام آباد ۔ 6 فروری (اے پی پی) وزیراعظم دے مشیر قومی تاریخ وادبی ورثہ عرفان صدیقی دی زیرصدارت اجلاس اچ ’قومی کتاب میلے‘ دے انعقاد دی باضابطہ منظوری ڈے ڈتی گی۔ چار روزہ قومی کتاب میلہ چھی اپریل کوں وفاقی دارالحکومت اسلام آباد اچ شروع تھیسی جیں اچ سارے ملک توں اشاعتی اداریں دے علاوہ چین، ایران، ترکی، مصر، تیونس، تاجکستان، آذربائیجان اتے عمان وی حصہ گھنسن ۔منگل کو ںقومی تاریخ وادبی ورثہ ڈویژن اچ منعقدہ خصوصی اجلاس اچ میلے دے انعقاد سانگے انتظامات دا تفصیلی جائزہ گھداگیا۔ عرفان صدیقی آکھیا کتاب دا ودھارا معاشرے اچ امن، بھائی چارے اتے انسانی اقدار دے ودھارے دا ساریں توں موثر ذریعہ ہے۔ کتاب میلہ نیشنل بک فاﺅنڈیشن دی ہک روشن روایت ہے جیرھا جو ایں سال وی نویں آب وتاب دے نال اگی تے ودھائی ویسی۔انھاں آکھیا جو 6 توں 9 اپریل تئیں پاک چائنا سینٹر اچ منعقدہ قومی کتاب میلے اچ 120 توں ودھ سٹال دی گنجائش رکھی ویسی ۔ ملک دے نامور اشاعتی اداریں دے نال نال کئی دوست ملک وی ایں میلے اچ شرکت کریسن جیں اچ چین، ایران، ترکی، مصر، تیونس، تاجکستان، آذربائیجان اتے عمان شامل ہن۔ عرفان صدیقی توقع ظاہر کیتی جو ہمیشہ وانگوںایں سال وی اسلام آبادتے نیڑے دے لوک کتاب میلے اچ بھر پور شرکت کریسن۔چار ڈینھ میلے دے دوران علمی وادبی تقریبات، کتاباں دی رونمائی، مباحثے، سیمینارز اتے بالاں سانگے خصوصی پروگرام وی منعقد تھیسن۔ اجلاس دے دوران نیشنل بک فاﺅنڈیشن دے ایم ڈی ڈاکٹر انعام الحق جاوید انتظامات دے حوالے نال تفصیلی بریفنگ ڈتی۔ اجلاس اچ وفاقی سیکرٹری قومی تاریخ تے ادبی ورثہ ڈویژن انجینئر عامر حسن دے علاوہ وزارت اتے نیشنل بک فاﺅنڈیشن دے بئے افسران شریک ہن۔
