اسلام آباد ۔ 27 مارچ (اے پی پی) وفاقی وزیر منصوبہ بندی، ترقی، اصلاحات و داخلہ احسن اقبال آکھیے جو امن دے بغیر ترقی ممکن کائنی ،جڈاں ملک اچ امن تھیسی تاں ترقی تھیسی ،پاکستان دی شرح نمو گزریل دور حکومت دے مقابلے توں ودھ اے ،نیشنل ایکشن پلان دے ذریعے پاکستان جرم دے خاتمے سانگے کامیابی حاصل کیتی ،سی پیک نال خطے دی تقدیر بدل ویسی ۔اے گال انہاں منگل کوں پاکستان پلاننگ اینڈ مینجمنٹ انسٹیٹیوٹ میں ”داخلی سلامتی، امن اور پائیدار ترقی“ دے عنوان توں قومی کانفرنس دے افتتاحی سیشن نال خطاب کریندے ہوئیں آکھی ۔وفاقی وزیر آکھیا پاکستان دا شمار انہاں ملکاں اچ تھیندے جتھاں نینگراں دی تعداد ساریں توں ودھ اے ،اسلام امن تے محبت دا درس ڈیندے ،امن تے ترقی ہک سکے دے ڈو پاسے ہن ۔انہاں آکھیا اساکوں چاہیدے جو پائیدار ترقی دے اہداف کوں حاصل کرنر سانگے اپنڑے اندرلے جھیڑے کوں مکاووں تے ملک دی معیشت کوں بہتر انداز اچ اگی تے ودھاﺅں ۔انہاں آکھیا 2013دے مقابلے اچ ملک اچ سیکورٹی دے حالات بہوں چنگے ہن اینکوں مزید بہتر بنڑاونڑ سانگے اقدامات کریندے پیوں تاں جو ملک اچ من کوں برقرار رکھیا ونج سگے ۔انہاں آکھیا اساڈے ملک کوں پہلے خطرناک ملک آکھیا ویندا ہئی ہنڑ دنیا اینکوں ایشیا دی ابھردی ہوئی معیشت قرار ڈیندی پئی اے ۔انہاں آکھیا دنیا کوں پر امن بنڑاونڑ ایں وقت ساریں توں وڈا چیلنج اے ایندے نال نبڑنڑ سانگے اساکوں سانجھا لائحہ عمل اپناونڑاں ہوسی ۔
