اسلام آباد ۔ 26 اپریل (اے پی پی) وزیراعظم شاہد خاقان عباسی آکھیے جو حکومت تریمتیں کوں ہکو جہے موقع دی فراہمی سانگے موثر اقدامات کریندی پئی ہے تاں جو اپنڑیاں بہترین صلاحیت دا مظاہرہ کریندے ہوئیں سارے زندگی دے شعبے اچ اگی تے ودھ سگن۔انھاں اے گال خمیس کوں وزیراعظم آفس اچ وزارت انفارمیشن ٹیکنالوجی اینڈ ٹیلی کمیونیکیشن دے اہتمام نال کمپیوٹر کوڈ نگ دی تعلیم حاصل کرنڑ آلیاں چھوہریں دے اعزاز اچ تقریب نال خطاب کریندے ہوئیں آکھی ۔وزیراعظم آکھیا او سمجھدن اگر پاکستانی تریمتیں کوں ہکو جہے موقع ڈتے ونجن تاں اپنڑیاں صلاحیتاں دا بہترین انداز اچ مظاہرہ کرنڑ دی صلاحیت رکھیندن ۔انہاں سارے ملک اچ چھوہریں کوں کمپیوٹر دی تعلیم دی عملی تربیت دی فراہمی سانگے منصوبے دی تعریف کیتی جیں نال انہاں کوں اقتصادی طور تے مستحکم تھیونڑ اچ مدد مل ویسی ۔انہاں آکھیا اے پروگرام 30 ہزار تریمتیں کوں ڈیجیٹل مہارتاں بارے آگاہی ڈیسی جیرھا جو پاکستان بیت المال دا حصہ ہن تے آئی سی ٹی سکول پروگرام نال ہک لکھ 10ہزار مستفید تھیسن ۔انہاں ملک دے علاقیںا چ وزارت انفارمیشن ٹیکنالوجی دی وسیع تر رسائی دے حوالے نال کردار کوں سراہیا ۔ وزیر اعظم شاہد خاقان عباسی یونیورسل سپورٹ فنڈ اتے یو این وومن وچال ” لیٹر آف انٹینٹ “تے دستخط دی تقریب اچ وی شرکت کیتی ۔ انہاں ڈیجیٹل تربیت حاصل کرنڑ آلیاں چھوہریں اچ ہواوے ولوں 150 الیکٹرانک ٹیبلٹس وی ونڈیے۔
