لندن۔ 19 اپریل (اے پی پی) وزیر اعظم شاہد خاقان عباسی آکھیے جو حکومت پاکستان نظر دی محرومی کوں روکنڑ سانگے کوشش کریندی پئی اے ۔ ایں ضمن اچ ہر ممکن اقدامات کرنڑ سانگے حکومت پرعزم اے۔ انہاں اے گال خمیس کوں اتھاں دولت مشترکہ سربراہان مملکت دے اجلاس دے موقع تے نظر دی محرومی دے حوالے نال فلاحی اقدام کرنڑ آلے عالمی اداریں”پیک وژن“ اتے ”سی بی ایم“ دے نال اجلاس اچ آکھی۔ واضح رہے جو پیک وژن نظر دی محرومی مکاونڑ سانگے ترقی پذیرملکاں اچ سمارٹ فون ٹیکنالوجی دے استعمال اتے صحت توں متعلق افرادی قوت دی تربیت دے میدان اچ ہک مشہور اتے وڈاعالمی ادارہ اے، سی بی ایم اکھیں دی ڈیکھ بھال تے خصوصی توجہ ڈیندے ہوئیں ہک صدی توں ودھ عرصے توں عالمی سطح تے نظر توں محرومی دے شعبہ اچ کم کرنڑ آلی بین الاقوامی غیر سرکاری ترقیاتی تنظیم اے۔ اجلاس اچ پیک وژن دی نمائندگی ایندے سی ای او اتے شریک بانی ڈاکٹر اینڈریو باستاﺅروس کیتی جڈانجو سی بی ایم دی نمائندگی ڈائریکٹر آئی ہیلتھ ڈاکٹر بابر قریشی کیتی۔ اجلاس اچ قابل علاج اندھاپن کوں مکاونڑ سانگے پاکستان کوں درپیش وڈے چیلنجاں تے گال بات کیتی گی، ہک اندازے مطابق پاکستان دے 80لکھ توں ودھ شہری نظر توں محرومی دا شکار تھی ویندن ۔ سی بی ایم دے نال پیک وژن پاکستان دے صحت دے بنیادی ڈھانچے اتے عملے توںخدمات گھن تے پاکستانی شہریاں سانگے تشخیص اتے علاج دے حوالے نال جدید ترین حل پیش کرنڑ سانگے اپنڑی سانجھے داری سانگے تیار ہے۔ وزیرا عظم شاہد خاقان عباسی پیک وژن کو ںپاکستان دے دورہ دی دعوت ڈیندے ہوئیں پاکستان اچ اندھے پن کوں مکاونڑ سانگے حکومت دے عزم دا اظہار کیتا ۔ وزیراعظم ایں ضمن اچ ہک قومی پروگرام سانگے حکومت ولوں ہر قسم دی حمایت داوی اظہارکیتا۔ پیک وژن اتے سی بی ایم ایں نیک مقصد سانگے حکومت پاکستان دے نال رل مل تے کم کرنڑ تے اتفاق کیتا۔ وزیراعظم دے معاون خصوصی علی جہانگیر صدیقی اتے برطانیہ اچ پاکستان ہائی کمشنر سید ابن عباس وی اجلاس اچ شریک ہن۔
