جدہ ۔ 29 اپریل (اے پی پی) امام کعبہ عبدالرحمان السدیس آکھیے جو سعودی عرب اعتدال پسندی اتے پرامن بقائے باہمی دے تصورات کو ں ودھارا ڈیندا پے ، اسلام ہر قسم دی دہشت گردی کو ں مسترد کریندے ۔ ایں ضمن اچ مسلم ملکاں اچ ذرائع ابلاغ کوں اپنڑاں اہم کردار ادا کرنڑاں چاہیدے ۔انہاں اے گال قومی خبر رساں ادارے ایسوسی ایٹڈ پریس آف پاکستان (اے پی پی) دے منیجنگ ڈائریکٹر مسعود ملک دی قیادت اچ پاکستانی میڈیا تے فد نال گال بات کریندے ہوئیں آکھی جیں مدینہ منورہ اچ انہاں دے دفتر اچ انہاں نال ملاقات کیتی ۔حرمین الشریفین دے عمومی صدر تے امام کعبہ آکھیا جو اساں ساریں کوں ہر طرح نال اسلام دے دفاع سانگے کم کرنڑاں چاہیدے تے دہشت گرداں کوں اسلام کوں یر غمال بنڑاونڑ دی اجازت ہرگز نی ڈیونڑیں چاہیدی ۔اسلامی میڈیا دے حوالے نال انہاں آکھیا جو مسلم ملکاں اچ صحافی تے اہم ذمے واری ہوندی اے او حقیقی اسلام دا دفاع کرن جیرھا جو دہشت گردی کوں مسترد کریندے تے امن تے برداشت دا درس ڈیندے ۔انہاں آکھیا خادم الحرمین الشریفین اتے سلطنت سعودی عرب ہمیشہ عازمین حج اتے عمرہ ادا کرنڑ آلیں دی خدمت کریندے رہسوں کیوں جو اساں اﷲ سئیں دے مہماناں دی خدمت کوں اپنڑاں فرض سمجھدوں ۔ شیخ عبدالرحمان آکھیا جو سعودی عرب مسلم امہ دے اتحاد، مکہ مکرمہ و مدینہ منورہ دے مقدس جہیں دی پاسبانی تے ترقی اچ کلیدی کردار ادا کریندا پے ۔ امام کعبہ مسلم امہ دی حمایت سانگے پاکستان دی حکومت دے کرداردی تعریف کریندے ہوئیں آکھیا جو پاکستان امہ دے ایشوز دی حمایت اچ ہمیشہ پیش پیش رہیا اے ۔ پاکستان اتے سعودی عرب اوکھے دور اچ ہمیشہ ہک ڈوجھے دا ساتھ ڈتا ۔ انہاں پاکستان اتے سعودی عرب دی سلامتی اتے ڈوہیں قوماں دی ترقی تے خوشحالی سانگے نیک تمناواں دا وی اظہار کیتا ۔ امام کعبہ پاکستان اتے پاکستانی قوم نال محبت دا اظہار کریندے ہوئیں اردو زبان اچ پاکستان زندہ بادآکھیا۔
