کوئٹہ ۔4 اپریل(اے پی پی ) صدر مملکت ممنون حسین آکھیے جو بلوچستا ن پاکستان دا مستقبل تے نینگر ایندے معمار ہن ،پاکستان دا ساریں توں وڈا صوبہ اپنڑے قدرتی وسائل پاروں تاریخ دا دھارا بدالنڑ آلا اے ،جیں تے بعد صوبے تے خوشحالی دے دروازے کھل ویسن ،ایں سانگے بلوچستان دے عوام سازشاں کوں ناکام بنڑا تے اپنڑے بالاں دا مستقبل محفوظ بنڑاون ۔صدر مملکت اے گال کوئٹہ اچ سردار بہادر خان ویمن یونیورسٹی کوئٹہ دے نوویں کانووکیشن نال خطاب کریندے ہوئیں آکھی ۔ایں موقع تے گورنر بلوچستان محمد خان اچکزائی وی خطاب کیتا جڈاں جو صدر مملکت جامعہ توں فارغ التحصیل تھیونڑ آلیاں طالبات کوں ڈگریاں تے چنگی کاکردگی دا مظاہرہ کرنڑ آلیاں اچ اعزازت ونڈیے ۔صدر مملکت ایں موقع تے اپنڑے خطاب اچ آکھیا حقیر مفادات توں اچے تھی تے ترقی سانگے کم کیتا ونجے تے ماضی دے جھیڑیں کوں بھلا تے اپنڑے بالاں دے مستقبل سانگے اگی تے ودھیا ونجے ۔انہاں آکھیا پاکستان دیاں بالڑیاں تعلیم سانگے پوری دنیا اچ ویسن لیکن اجنبی تہذیباں دی اندھی تقلید توں بچن ،انہاں آکھیا بلوچستان اچ سو فیصد امن بحال کر ڈتا گیا ،دہشت گردی دے بچے کھچے اثرات دا وختی خاتمہ کر ڈتا ویسی ۔انھاں آکھیا بلوچستان دے لوکاں امن سانگے ودھ ساریاں قربانیاں ڈتیاں ہن ۔ صدر مملکت آکھیا پاک چین اقتصادی راہداری جیہوجے عظیم الشان منصوبیں دے تناظر اچ بلوچستان دے نینگراں تے خاص طور تے بالڑیاں کوں اپنڑے علم تے ہنر دے بل تے کلیدی کردار ادا کرنڑاں اے ۔اقتصادی راہداری نال جیرھے موقع پیدا تھیونڑ ویندے پن،انہاں توں فائدہ چاونڑ سانگے ماضی توں کتھائیں ودھ تے علم تے اہلیت تے کاکردگی دی ضرورت ہوسی۔ میکوں خوشی اے جو سردار بہادر خان ویمن یونیورسٹی ایں چیلنج نال نبڑنڑ سانگے قابل قدر کردار ادا کریندی پئی اے ،انہاں آکھیا پاکستان خاص طور تے بلوچستان بری ،بحری تے فضائی رستے نال پوری دنیا نال رلنڑ ویندا پے جیں پاروں کاروبار جدید شکل اچ منظم تھیسن روزگار دے نویں موقع پیدا تھیسن ،تجارت تے سیاحت سانگے وڈی تعداد اچ غیر ملکی اتھاں آسن ۔انہاں آکھیا بلوچستان دے غیرت مند عوام دی اے ذمے واری اے جو انہاں سازشاں کوں ناکام بنڑا تے اپنڑے بالاں دا مستقبل محفوظ بنڑاون ،ایندے نال ہی پاکستان دے کھلے تے لکیے دشمناں تے وی واضح کرینداں جو اپنڑے داخلی ،سیاسی تے غیر سیاسی اختلافات دے باوجود پاکستانی قوم سیسہ پلائی دی دیوار اے جیں نال ٹکراونڑ ہر آلی ہر طاقت پاش پاش تھی ویسی ۔
