مشترکہ مفادات کونسل پہلی آبی پالیسی اتے پاکستان واٹر چارٹر دی متفقہ منظوری ڈے ڈتی
وزیراعظم شاہد خاقان عباسی دی صدارت اچ کونسل دے اجلاس اچ چارہے وزراءاعلیٰ، وفاقی تے صوبائی وزراءاتے سینئر حکام شرکت کیتی
اسلام آباد ۔ 24 اپریل (اے پی پی) مشترکہ مفادات کونسل پہلی آبی پالیسی اتے پاکستان واٹر چارٹر دی متفقہ طور تے منظوری ڈے ڈتی ہے ۔ مشترکہ مفادات کونسل دا 37 واں اجلاس منگل کوں وزیراعظم شاہد خاقان عباسی دی صدارت اچ وزیراعظم آفس اچ تھیا۔ اجلاس اچ وزیراعلیٰ پنجاب محمد شہباز شریف، وزیر اعلیٰ سندھ سیّد مراد علی شاہ، وزیراعلیٰ خیبرپختونخوا پرویز خٹک ، وزیر اعلیٰ بلوچستان عبدالقدوس بزنجو، وفاقی تے صوبائی وزراءاتے سینئر حکام شرکت کیتی۔ اجلاس اچ قومی آبی پالیسی اُتے گالھ مہاڑ کیتی گئی ۔ پہلی آبی پالیسی اتے پاکستان واٹر چارٹر اُتے دستخط سانگے وزیراعظم آفس اچ خصوصی تقریب تھئی ۔ وزیراعظم اتے چارہے وزراءاعلیٰ چارٹر اُتے دستخط کیتے جیکوں متفقہ طور تے منظور کر گھداگیا۔۔ ڈپٹی چیئرمین پلاننگ کمیشن سرتاج عزیز مشترکہ مفادات کونسل کوں قومی آبی پالیسی مسود ے بارے ڈسایا۔ انہاں ڈسایا جو اے پالیسی سارے وڈے فریقین نال مشاورت دے بعد تیار کیتی گئی ہے اتے ہک قومی سطح دا مشاورتی سیمینار وی اتفاق رائے وضع کرنڑ کیتے منعقد کیتا گئے ۔ مشترکہ مفادات کونسل دے 36 ویں اجلاس اچ پیش کیتی گئی تجویزاں کوں پالیسی اچ شامل کیتاگئے ۔ انہاں آبی استعمال اتے ترجیحات دے تعین، آبی وسائل دی ترقی اتے استعمال کیتے مربوط منصوبہ بندی، طاس دی ماحولیاتی ہم آہنگی، ماحولیاتی تبدیلی دے اثرات، پانڑیں دے حصے، آبپاشی اتے بارش دے پانڑیں اُتے منحصر زراعت، پیونڑدے صاف پانڑیں اتے نکاسی ، پن بجلی، صنعت، زمینی پانڑیں، آبی حقوق تے ذمہ داریاں، پائیدار آبی ڈھانچہ، پانڑیں بارے مسائل، کوالٹی مینجمنٹ، آگاہی اتے تحقیق، تحفظ دے انتظامات، قنونی فریم ورک اتے آبی شعبہ دے اداریاں دی استعداد کار ودھاونڑ سمیت قومی آبی پالیسی دے خدوخال بارے وضاحت کیتی۔ مشترکہ مفادات کونسل کوں ڈسایا گئے جو ”قومی واٹر کونسل“ دے ناں نال قومی سطح دے ادارے دے ذریعے قومی آبی پالیسی اُتے عملدرآمد کیتا ویسی جیندی صدارت وزیراعظم کریسن اتے وفاقی وزراءبرائے آبی وسائل، خزانہ، بجلی، منصوبہ بندی تے ترقی اتے سارے وزراءاعلیٰ ایندے ارکان ہوسن ۔ قومی آبی کونسل قومی آبی پالیسی اُتے عملدرآمد دی نگرانی کریسی اتے وفاقی وزیر آبی وسائل دی سربراہی اچ ہک قائمہ کمیٹی وفاقی تے صوبائی حکومتاں اتے متعلقہ محکمیاں دے نمائندیاں دے نال عملدرآمد دی نگرانی کریسی ۔
