اسلام آباد ۔ 9 اپریل (اے پی پی) صدر مملکت ممنون حسین آکھے جو پی ایس ایل ٹورنامنٹ کوں پاکستان اچ عالمی کرکٹ دی واپسی دا کریڈٹ ویندے، پی ایس ایل نال قومی کرکٹ کوں ڈھگ سارا فائدہ تھئے، پی ایس ایل دے انعقاد نال دہشت گردی ہار گئی اتے امن جیت گئے، عوام دی بھر پور شرکت نال دنیا کوں ا یہ پیغام گئے جو پاکستانی پرامن اتے کھیڈاں نال محبت کرنڑ آلے لوک ہن۔ انہاں ا یہ گالھ ایوان صدر اچ پی ایس ایل جیتنڑ آلی ٹیم اتے ایندی مینجمنٹ نال گالھ بات کریندے ہوئیں آکھی ۔ سونوار کوں پی ایس ایل جیتنڑ آلی ٹیم سیّد علی رضا نقوی دی قیادت اچ صدر پاکستاں نال ایوان صدر اچ ملاقات کیتی۔ صدر مملکت آکھیا جو کرکٹ دی بحالی نال کھیڈاں دی صنعت کو ں ودھارا ملسی۔ انہاں آکھیا جو پاکستان اچ کھیڈاں دے فروغ نال معیشت اچ چنگائی آوسی، خاص طور تے کھیڈاں دا سامان بنا ونڑ آلی صنعت اچ روزگار دے مواقع ملسن ۔ انہاں آکھیا جو کھیڈاں اچ برداشت اتے سپورٹس مین سپرٹ دی سبھ توں ودھ ضرورت ہوندی ہے اتے کھلاڑی اپنڑی کارکردگی تے کڈاہیں وی غرور نہ کرین ،ایندے نال زوال داراستہ کھل ویندے ۔ انہاں آکھیا جو نوجوان کھلاڑی جنہاں اچ شاداب، سمیع، طلعت، صاحبزادہ اتے آصف شامل ہن ،انہاں کھلاڑیاں توں ودھ ساریاں توقعات ہن۔ انہاں آکھیا جو کھلاڑی فٹنس تے توجہ رکھنڑ اتے غیر ضروری سرگرمیاں توں بچنڑ ۔ انہاں کھلاڑیاں کوں مشورہ ڈتا جو نوجوان کھلاڑی مصباح اتے یونس دے نقش قدم تے چلدے ہوئیں حریفاں توں جیتنڑ۔ ایں موقع تے ٹیم دے کپتان مصباح الحق اتے اسلام آباد ٹیم دی انتظامیہ دے عہدیداراں صدر مملکت داشکریہ ادا کیتا اتے ایںعزم دا اظہار کیتا جوا وہ قومی پرچم دی سربلندی سانگے اپنڑیاں صلاحیتاںدا استعمال کریندے راہسن۔
