اسلام آباد ۔ 15 مئی (اے پی پی) سینیٹ فلسطین اچ اسرائیلی مظالم تے مذمتی قراردادمنظور کر گھدی اے اتے آکھیے جو اے ایوان بے گناہ اتے معصوم فلسطینیاں تے اسرائیلی قابض فوجاں دے ظلم دی مذمت کریندے۔سینٹ اچ قائد ایوان راجہ ظفر الحق قرارداد پیش کیتی جو ایوان بالا عوام دے جذبات کوں سامنڑے رکھیندے ہوئیں اسرائیلی مظالم دی سخت مذمت کریندے جیں پاروں 70 بال ، تریمتیں اتے جوان شہید تھین جڈان جو سیکڑاں زخمی ہین۔قرارداد موجب سینیٹ امریکی سفارت خانہ بیت المقدس منتقل کرنڑ دے امریکی فیصلے کوں وی مسترد کیتے جو اے عالمی قانون اتے اقوام متحدہ دے چارٹر دی خلاف ورزی اے۔ سینیٹ اسرائیل دی ریاستی دہشت گردی دی مذمت کریندے ہوئیں فلسطینیاں دے منصفانہ موقف کیتے پاکستان دی حمایت اتے یکجہتی دا عزم کیتا۔قرار داد فلطینیان اتے کشمیریاں تے تھیونر آلے مظالم تے اسرائیل اتے بھارتی دی مذمت کیتی جو ڈوہیں ملک عالمی قوانین،انسانی حقوق اتے اقوام متحدہ دے چارٹر دی خلاف ورزی کریندے پین جیندے تے عالمی برادری نوٹس گھنے۔ایوان فلسطینی عوام دیاں قربانیاں اتے بہادری دی وی تعریف کیتی جیہڑے اپنڑے خون نال اسرائیلی مظالم دے اگو بند بنڑ تے کھڑے تھی گین۔ایوان قراداددی متفقہ منظوری ڈتی۔
