اسلام آباد ۔ 23 مئی (اے پی پی) سیکرٹری خارجہ تہمینہ جنجوعہ آکھیے جو شنگھائی تعاون تنظیم پورے خطے کوں ترقی اتے خوشحالی دے رستے تے ٹورنڑ دی صلاحیت رکھیندی اے ۔پاکستان سیاسی اتفاق رائے نال دہشت گردی اتے انتہا پسندی دے خلاف کامیابیاں حاصل کیتیاں ہن ۔شنگھائی تعاون تنظیم دے رکن ملکاں دہشت گردی دے خاتمے سانگے پاکستان دے تجربیں توں فائدہ چا سگدن ۔اے گال انہاں بدھ کوں شنگھائی تعاون تنظیم دے رکن ملکاں دے قانونی ماہرین دے اجلاس دی افتتاحی نشست نال خطاب کریندے ہوئیں آکھی ۔انہاں آکھیا جو پاکستان 200 ملین صارفین دی مارکیٹ اے۔پاکستان شنگھائی تعاون تنظیم دے رکن ملکاں سانگے سانجھی تجارت اتے تعاون سانگے شاندار موقع فراہم کریندے۔ او ایندے توں فائدہ چا سگدے ہن انہاں آکھیا جوپاکستان دے شنگھائی تعاون تنظیم دے رکن ملکاں دے نال تاریخی ، دوستانہ اتے تجارتی تعلقات ہن انہاں آکھیا جو پاکستان دہشت گردی اتے انتہا پسندی کوں شکست ڈتی اے۔ دہشت گردی دے خلاف جنگ اچ ہزاراں پاکستانی شہید تھن تے معاشی ضیان وی چاونڑاں پئے تاں جو ایندے باوجود اساں دہشت گردی دے پورے خاتمے سانگے پرعزم ہوں۔ انہاں آکھیا جو پاکستان دہشت گردی دے خاتمے سانگے سیاسی اتفاق رائے نال کوششاں کیتیاں ہن جیں دے تحت اساں ملک دی تقدیر بدالنڑ اچ کامیاب تھی گیوں ۔ تہمینہ جنجوعہ آکھیا جو اساں انسداددہشت گردی دی قومی حکمت عملی وضع کیتی اے جیرھا جو قانون دی حکمرانی ، شہریاں تے میڈیا دی شمولیت ، مربوط تعلیمی اصلاحات سمیت بئے نکات تے مشتمل ہن۔ انہاں آکھیا جو پاکستان خطے توں دہشت گردی دے خاتمے سانگے شنگھائی تعاون تنظیم دے رکن ملکاں دے نال رل تے کم کرنڑ چاہندے ۔پاکستان دہشت گردی اتے انتہا پسندی دے خلاف شنگھائی تعاون تنظیم دیاں کوششاں دی حمایت کریندے تاں جو انسدداد دہشت گردی تے انتہا پسندی دے خلاف اقدامات اقوام متحدہ دے منشور دے مطابق تھیونڑیں چاہیدن ایندے تے دوہرا معیار نی ہوونڑاں چاہیدا ۔انہاں آکھیا جو عالمی اتفاق رائے ہے جو دہشت گردی کوں کہیں مذہب تے قوم نال نی رلایا ونج سگدا ۔ اساکوں یقین اے جو ایس سی او دہشت گردی اتے انتہا پسندی دے خلاف موثر فورم اے۔ شنگھائی تعاون تنظیم دے رکن ملکاں دہشت گردی تے انتہا پسندی دے خاتمے سانگے اساڈے تجربیں توں فائدہ چا سگدے ہن۔اجلاس اچ روس ، چین ، ازبکستان ، تاجکستان ، کرغزستان اتے بھارت دے نمائندے وی شرکت کریندے پن۔شنگھائی تعاون تنظیم دے ایں گروپ دے اجلاس دا مقصد دہشت گردی اتے انتہا پسندی دے خلاف علاقائی سطح تے مربوط کوششاں کوں یقینی بنڑاونڑاں اے ۔اجلاس اچ علاقائی سلامتی سمیت بئے امور تے تبادلہ خیال کیتا ۔ مہمان وفد اجلاس سانگے شاندار انتظامات کرنڑ تے پاکستان دی تعریف کیتی۔
