اسلام آباد ۔ 2 مئی (اے پی پی) وزیراعظم شاہد خاقان عباسی نال کینیا دی وزیر خارجہ ڈاکٹر مونیکا جمعہ بدھ کوں اتھاں وزیراعظم ہاﺅس پاکستان اچ کینیا دے ہائی کمشنر دے کٹھے ملاقات کیتی۔کینیا دی وزیر خارجہ ، کینیا دے صدر دے خصوصی نمائندے دے طور تے اج کل پاکستان دے دورہ تے ہن ۔ ملاقات اچ انہاں کینیا دے صدر ولوں وزیراعظم کوں کینیا دے دورے دی خصوصی دعوت ڈتی۔وزیراعظم ہاﺅس ولوں جاری بیان مطابق ملاقات دے دوران وزیراعظم شاہد خاقان عباسی جاری مہینے شروع اچ تھیونڑ آلی برطانیہ اچ دولت مشترکہ دے سربراہان مملکت دے اجلاس دے موقع تے کینیا دے صدر نال اپنڑی ملاقات دا حوالہ ڈتا۔وزیراعظم شاہد خاقان عباسی نال کینیا دی وزیر خارجہ اتے ہائی کمشنر وچال تھیونڑ آلی ملاقات دوران ڈوہائیں فریقاں وچال سانجھی دلچسپی دے امور اتے ڈو طرفہ تعلقات دے ودھارے سمیت بین الاقوامی مسئلیاں تے گال بات تھی۔ڈوہائیں ملکاں دے آپس اچ تعلقات دی موجودہ صورتحال تے اطمینان دا اظہار کریندے ہوئیں وزیراعظم پاکستان اتے کینیا وچال مختلف شعبیں اچ تعاون اتے ڈوطرفہ تجارت دے ودھارے دی ضرورت تے زور ڈتا۔
