اسلام آباد ۔ 13 مئی (اے پی پی) وزیر اعظم دے مشیر قومی سلامتی لیفٹیننٹ جنرل (ر) ناصر خان جنجوعہ آکھیے جو پاکستان دہشت گردی دے خلاف جنگ اچ ودھ ساریاں قربانیاں ڈے تے کامیابیاں حاصل کیتیاں ہن ،پاکستان تے ڈبل گیم دا الزام لاونڑ دی بجائے عالمی برادری کوں وی انہاں قربانیاں دا عتراف کرنڑاں چاہیدے ،، پاکستان، افغانستان دی سالمیت اتے علاقائی خودمختاری دا احترام کریندے ، سوویت یونین دے خاتمے دے بعد امریکا تے عالمی برادری اتھوں چلی گی تے اساکوں بعد دے حالات نال نبڑنڑ سانگے کلہا چھوڑ ڈتا ،بلوچستان تے کراچی اچ الجھایا گیا ،اساں فاٹا سمیت ہرجاہ تے مقابلہ کیتا ،پاک افغان بارڈر تے ساریں توں اچی جاہ 24ہزار فٹ اے ،اساں دنیا دے ایں اوکھے علاقیں اچ دہشت گردی دے خلاف جنگ لڑی اے ۔او اتوار کوں اے پی پی دے اہتمام نال خبر رساں اداریں وچال اشتراک کار دے ودھارے سانگے ”پاکستان دا میڈیا، موقع اتے چیلنجز“ دے عنوان نال 2 ڈینہاں دی”انٹرنیشنل کانفرنس آف نیوز ایجنسیز“ (آئی سی این اے) اچ شرکاءنال عالمی اتے علاقائی امن اچ پاکستان دے کردار دے حوالے نال خطاب کریندے پے ہن ۔ وفاقی وزیر اطلاعات و نشریات مریم اور اورنگزیب کانفرنس دی افتتاحی تقریب اچ مہمان اعزاز دے طور تے شریک ہن۔ ایڈیشنل سیکرٹری وزارت اطلاعات و نشریات شفقت جلیل‘ منیجنگ ڈائریکٹر ایسو سی ایٹڈ پریس آف پاکستان (اے پی پی ) مسعود ملک ‘وزارت اطلاعات و نشریات تے اے پی پی دے حکام موجود ہن ۔ آئی سی این اے اچ چین، انڈونیشیا، آذربائیجان، ایران، رومانیہ، اومان، بلغاریہ، ترکی، مصر، قزاخستان، لبنان، سوڈان، تیونس، سعودی عرب اتے شام سمیت 16 ملکاں توں 20 مندوبین شریک ہن۔ قومی سلامتی دے مشیر لیفٹیننٹ جنرل (ر) ناصر خان جنجوعہ اے پی پی ولوں ساری دنیا دے مختلف ملکاں دی نیوز ایجنسیاں دیاں کانفرنساں دے انعقاد دی کاوش کوں سراہیا تے ایں کانفرنس نال عالمی سطح تے پاکستان دا مثبت تشخص اجاگر تھیسی۔ انہاں آکھیا جو امریکا افغانستان اچ طالبان دی حکومت دا خاتمہ کیتا جیں تے طالبان امریکا تے عالمی براداری کوں غاصب قرار ڈتا ۔ای وی طالبان ایں جنگ کوں اپنڑے وطن دی آزادی دی جنگ اکھیندے ہن ۔انہاں آکھیا جو امریکا تے اساں طالبان دی حمایت تے طالبان تے اساں امریکا دی حمایت دا الزام لیندے پیوں ۔انہاں سوال کیتا جو اگر پاکستان امریکا دا اتحادی نہ بنڑدا تاں کیا اج افغانستان آزاد تھی ویندا ،اگر سوویت یونین قائم رہندا تاں کیا دیوار برلن ڈھاندی ،کیا 14ملک آزادی حاصل کر سگدے ،کیا امریکا سوویت یونین دی موجودگی تے سپر پاور بنڑدا ۔انہاں آکھیا جو سوویت یونین دے خاتمے دے بعد امریکا تے عالمی برادری اتھوں چلی گی اساکوں بعد دے حالات نال نبڑنڑ سانگے کلہا چھوڑ ڈتا ۔انہاں آکھیا اساں پاک افغان سرحد تے فوج تعینات کیتی ،پاکستان تے افغانستان وچال 2611کلومیٹر طویل سرحد اے جیرھی جو اوکھیں رستیں دی اے پاک افغان سرحد تے ساریں توں اچی جاہ 24ہزار فٹ اے ،اے دنیا دے اوکھے علاقے ہن دنیا کوں چاہیدے جو او آوے تے اساڈی مدد کرے ۔انہاں آکھیا ماضی اچ بلوچستان اچ پاکستان دے پرچم کوں ساڑیا گیا، بلوچستان اچ یکجہتی دی گھٹکی ہئی جیں نال احساس محرومی پیدا تھیا اساں بلوچستان اچ مسلیں دے منڈھوں خاتمے دی بجائے رکاوٹ دے خلاف لرڈے پیوں ۔انہاں آکھیا اساں طاقت دی بجائے محبت دی حکمت عملی اختیار کیتی ،اج بلوچستان اچ لوکاں ہتھیا ر سٹ ڈتن ۔اج بلوچستان اچ ملک دے بئے حصیں وانگوں قوم پرچم لہریندا کھڑے ۔انہاں آکھیا اقوام متحدہ دے امن مشن اچ پاک فوج اپنڑاں کردار ادا کریندی پئی اے ۔انہاں آکھیا چین پاکستان اقتصادی راہداری منصوبے نال خطے اچ معاشی تے اقتصادی سرگرمیاں کوں ودھارا تھیسی ‘ پاکستان دے لوکاں کوں روزگار دے بہتر موقع مل ویسن ۔انہاں آکھیاپاکستان مستقبل اچ وسط ایشیائی ملکاں نال پوری دنیا سانگے اقتصادی سرگرمیاںدا مرکز بنڑ ویسی جیں نال ترقی دے نویں دور دا آغاز تھیسی ۔قومی سلامتی دے مشیر شرکاءکوں دستاویزاتی فلم دے ذریعے پاکستان دی ثقافت اتے خوبصورت علاقیں متعلق ڈسایا ۔
