اسلام آباد ۔ 22 جون (اے پی پی) نگران وزیراعظم جسٹس (ر) ناصر الملک دی زیر صدارت وفاقی کابینہ دا اجلاس جمعہ کوں وزیراعظم آفس اچ تھیا۔ کابینہ منیجنگ ڈائریکٹر بیت المال بیرسٹر عابد وحید شیخ دا استعفیٰ منظور کرگھدا اتے پاکستان بیت المال دا اضافی چارج ایڈیشنل سیکرٹری کابینہ ڈویژن کوں ڈیونڑ دی منظوری ڈے ڈتی۔ کابینہ انسانی وسائل دی ترقی دے شعبہ اچ تعاون سانگے پاکستان اتے سوڈان وچال مفاہمت دی یادداشت تے دستخط کرنڑ دی وی منظوری ڈتی۔ کابینہ حکومت پاکستان امریکی ڈالراں دی ایمنسٹی بانڈرولز 2018ءدی وی منظوری ڈتی۔ کابینہ مایہ ناز سفارت کار جمشید مارکردی فوتگی تے ڈکھ اتے تعزیت دا اظہار کریندے ہوئیں سفارت کاری دے میدان اتے ملک سانگے انہاں دیاں خدمات کوں خراج عقیدت پیش کیتا۔
