اسلام آباد ۔ 20 جولائی (اے پی پی) وفاقی وزیر اطلاعات،نشریات ،قانون، انصاف تے پارلیمانی امور بیرسٹر سید علی ظفر آکھیے جو قانون ساریں سانگے برابر ہوونڑاں چاہیدے ، محمد نواز شریف اتے مریم نواز کوں جیل مینوئل مطابق سہولت ڈتی ویندی پئی ہے ۔گزریل ڈینھ( خمیس )دی شام ہک نجی ٹی وی چینل دے پروگرام اچ گال کریندے ہوئیں انہاں آکھیا جو کہیں وی جاہ کوںسب جیل آکھنڑ حکومت دا حق ہے، عدالت اے کڈاہیں کائنا ں آکھسی جو کہیں خاص جیل اچ رکھیا ونجے۔ انہاں آکھیا جو ایں گال دی کوئی روک ٹوک کائنی جو مریم نواز کو کہیں بئی جاہ تے منتقل نئی کیتا ونج سگدا ۔ ہک سوال دے جواب اچ انہاں آکھیا جوعدالتی فیصلہ آونڑ دے بعد ایں تے عملدرآمد حکومت دا کم ہوندے۔ ہک بئے سوال دے جواب اچ انہاں آکھیا جو میں بدھ کوں تھیونڑ آلے کابینہ اجلاس اچ موجود ہم، فاٹا سمیت سکیورٹی اتے امن و امان دی صورت کو ںیقینی بنڑائے ونجنڑ دے حوالے نال اہم فیصلے کیتے گن لیکن مریم نواز دے سہالہ ریسٹ ہاﺅس اچ منتقل کرنڑ دا معاملہ اتھاںزیر بحث کائنی آیا۔انہاں آکھیا جو میڈے علم اچ کائناں ہئی جو انہاں کو ںسہالہ شفٹ کیتا ویندا پئے یا کر ڈتا گئے۔ انہاں آکھیا جو میکوں نی پتہ جو سہالہ ریسٹ ہاﺅس کوں سب جیل کیںبندے آکھیے۔
