نگران وزیراعظم جسٹس ریٹائرد ناصر الملک دے زیر صدارت وفاقی کابینہ دا اجلاس،منی لانڈرنگ و دہشتگردی روکنڑ سانگے ایکشن پلان تے عملدرآمد اچ سہولت کیتے خزانہ ڈویژن ولوں مجوزہ اقدامات دی منظوری

اسلام آباد ۔ 18 جولائی (اے پی پی)نگران وزیراعظم جسٹس ریٹائرد ناصر الملک دے زیر صدارت وفاقی کابینہ دے اسلام آباد اچ تھیونڑ آلے اجلاس اچ منی لانڈرنگ اتے دہشتگردی روکنڑ سانگے ایکشن پلان تے عملدرآمد اچ سہولت کیتے خزانہ ڈویژن ولوں مجوزہ اقدامات دی منظوری ڈتی گئی اے۔پر امن اتے شفاف انتخابات سانگے 42 ہزار توں ودھ سول آرمڈ فورسز دی تعیناتی،صوبائی حکومتاں نال نیکٹا، ایف آئی اے اتے نادرادے روابط ودھاونڑ، مجوزہ ضابطہ اخلاق تے عملدرآمداتے فول پروف سیکیورٹی اقدامات دی ہدایت کیتی۔کابینہ وفاقی حکومت دے گریڈ 17 توں 22 دے افسران دی ڈو ڈینہہ اتے گریڈ ہک توں 16دے اہلکاراں دی ہک ڈینہہ دی تنخواہ دیامر بھاشا اتے مہمند ڈیماں دی تعمیر کیتے عطیہ کرنڑ دی تجویز دی توثیق کیتی، کابینہ دے ارکان ایں فنڈ کیتے اپنڑی ہک مہینے دی تنخواہ ڈیسن۔سیکرٹری داخلہ اجلاس کوں عام انتخابات اچ امن و امان اتے سکیورٹی سانگے صوبائی حکومت دی معاونت بارے اقدامات اتے کوششاں دا ڈسایا جیندے اچ 42 ہزارتوں ودھ سول آرمڈ فورسز دی تعیناتی، نیکٹادے ذریعے صوبائی حکومتاں نال معلومات دے تبادلے، ایوی ایشن معاونت دی فراہمی ، ایف آئی اے اتے نادراولوں تکنیکی معاونت شامل اے۔کابینہ انتخابی ضابطہ اخلاق اتے سکیورٹی پروٹوکول تے سختی نال عملدرآمد دی ہدایت کیتی۔