اسلام آباد ۔ 17 جولائی (اے پی پی) نگران وزیراعظم جسٹس (ر) ناصر الملک وفاقی وزارت تعلیم و پیشہ ورانہ تربیت کوں ہدایت کیتی ہے جو نیوٹیک دے تربیتی پروگراماں اچ سانحہ مستونگ دے متاثرہ ٹبراں دے ودھ توں ودھ نینگراں کوں شامل کیتا ونجے ، تانجو او روزگار کماونڑ دے قابل تھی تے آپنڑیں ٹبراں دی مالی طور تے مدد کرسگن۔ انہاں اے گالھ منگل کوں وزیراعظم آفس اچ وفاقی وزارت تعلیم و پیشہ ورانہ تربیت بارے بریفنگ دی صدارت کریندے ہوئیں آکھی۔ وزیر برائے تعلیم و پیشہ ورانہ تربیت محمد یوسف شیخ وزیراعظم کوں وزارت دیاں کامیابیاں اتے مینڈیٹ بارے ڈسایا ۔ وزیراعظم کوں ڈسایا گیا جو نیشنل ایجوکیشن پالیسی 2018ءکوں وزارت ولوں اخیری شکل ڈے ڈتی گئی ہے ۔ سارے ملک اچ نصاب دی معیار بندی کیتے قومی نصاب کونسل وی قائم کر ڈتی گئی ۔ ایں طرح وزارت قومی نصاب ڈھانچہ وضع کیتے جیہرا جو نصاب اچ ہم آہنگی کیتے ہک نمونے دے طور تے کم کریسی ۔ ڈسایا گیا جو پری ۔ 1 توں گریڈ 8 کیتے وفاقی سطح اُتے وزارت ولوں نواں نصاب ڈتا گئے ۔ ایں نصاب نال صوبیاں کوں آگاہ کیتا ویسی ، جیندے نال انہاں کوں آپ دیاں درسی کتاباں اُتے نظرثانی اتے انہاں کوں چنگا کرنڑ اچ مدد ملسی ۔ نینگراں کوں ہنر مند بنڑاونڑ اتے مقامی تے عالمی منڈیاں اچ ہنر مند افرادی قوت دی تیاری کیتے نیوٹیک (این اے وی ٹی ٹی سی) دے کردار بارے تفصیلی بریفنگ وی ڈتی گئی۔وزیراعظم وزارت کوں اتے وی ہدایت کیتی جو وزارت ہک جامع اتے مربوط نظام ڈیوے تانجو آئین دے آرٹیکل 25-A کو ں ایندی حقیقی روح دے مطابق نافذ کیتا ونج سگے ۔
