اسلام آباد ۔ 29 اگست (اے پی پی) وزیر خارجہ شاہ محمود قریشی آکھے جو یو اے ای پاکستان دا اہم تجارتی اتے سرمایہ کار سانجھے دار ہے ، یو اے ای دے نال چنگے تعلقات دا فروغ اساڈی حکومت دیاں ترجیحات اچ شامل ہے، پاکستانی عوام دے دلاں اچ متحدہ عرب امارت دی خاص جاہ ہے ۔ اے گالھ انہاں پاکستان اچ یو اے ای دے سفیر حماد عبید ابراہیم صالم الزعبی نال گالھ مہاڑ کریندے ہوئیں آکھی ، جنہاں بدھ کوں اتھاں دفتر خارجہ اچ انہاں نال ملاقات کیتی ۔ دفتر خارجہ دے ترجمان دے مطابق سفیر شاہ محمود قر یشی کوں وزارت خارجہ دا عہدہ سنبھالنڑ اُتے مبارخ ڈتی اتے یو اے ای قیادت ولوں نیک تمناوا ں دا پیغام وی پجایا۔ انہاں آکھیا جو پاکستانی عوام دے دلاں اچ یو اے ای دی خاص جاہ ہے ۔ مرحوم شیخ زید بن سلطان النہیان کوں خراج عقیدت پیش کریندے ہوئیں وزیر خارجہ آکھیا جو مرحوم پاکستان دے سچے دوست اتے پاک۔یو اے ای گانڈھے دے معمار ہن ۔ انہاں پاکستان اچ پولیو دے خاتمے اتے یو اے ای۔پاکستان امدادی پروگرام دے تحت ملک دے دور پریں دے علاقیاں اچ ترقیاتی منصوبیاں اچ تعاون کیتے کراﺅن پرنس شیخ محمد بن زید النہیان دے کردار دی تعریف کیتی ۔ وزیر خارجہ توقع ظاہر کیتی جو او آندے مہینے اقوام متحدہ دی جنرل ا سمبلی دے اجلاس اچ آپ دے یو اے ای دے ہم منصب نال ملاقات کریسن ۔
