اسلام آباد ۔ 3 ستمبر (اے پی پی) وزیر خارجہ شاہ محمود قریشی پائیدار علاقائی امن سانگے رل مل تے کم کرنڑ دی ضرورت کوں اجاگر کریندے ہوئیں ایںامر دا اعادہ کیتے جو ہمسا ئے ہونڑ دی حیثیت نال پاکستان اتے افغانستان دی امن تے خوشحالی ہک بئے نال جڑی ہوئی ہے۔ انہاں یہ گالھ افغانستان دے وزیر خارجہ صلاح الدین ربانی نال گالھ بات کریندے ہوئیں آکھی جنہاں سونوار کوں پاکستانی ہم منصب کو ں ٹیلی فون کیتا اتے وزارت خارجہ دا منصب سانبھنڑ تے مبارخباد ڈتی۔ پاکستان سانگے افغان حکومت اتے عوام دیاں نیک خواہشاں دا اظہار کریندے ہوئیں صلاح الدین ربانی آکھیا جواوہ پاک افغان ڈو طرفہ تعلقات اچ استحکام دے خواہشمند ہن۔ ترجمان دفتر خارجہ ولوں جاری بیان مطابق ڈوہائیں رہنماواں مئی 2018ءاچ پاکستان افغانستان لائحہ عمل برائے امن تے یکجہتی(اے پی اے پی پی ایس) دے عمل دے شروع کرنڑ توں گھن تے تعلقات اچ حالیہ چناگئی دی تعریف کیتی ۔ ایہ گالھ نوٹ کیتی گئی جو ایں فریم ورک نال آپس دے معاملات تے غور سانگے ہک وڈا تے چنگا ادارہ جاتی نظام فراہم کیتے۔ ڈوہائیں رہنماواں ایں گالھ تے اتفاق کیتا جو اے پی اے پی پی ایس دا آندا دور وختی اسلام آباد اچ منعقد تھیسی ۔ انہاں اسلام آباد اچ سانجھی پاک افغان علماءکانفرنس کراونڑ دا وی خیر مقدم کیتا جیندی تریخاں کوں حتمی شکل ڈتی ویندی پی ہے۔ سکیورٹی بحران دی وجہ نال جلال آباد اچ پاکستانی قونصلیٹ جنرل دی بندش دے معاملے تے وی گالھ بات تھئی ۔ شاہ محمود قریشی افغان حکومت توں 28 اگست 2018ءتئیں موجود گزریل سکیورٹی انتظامات دی بحالی دی درخواست کیتی تاں جو قونصلیٹ جنرل اپنڑے پہلے دے معمول مطابق دوبارہ توں کم کر سگے۔ افغان وزیر خارجہ ایں ضمن اچ سدھے جواب دی یقین دہانی کرائی اتے گزریل ڈینھ کابل اچ پاکستانی سفیر نال اپنڑیں ملاقات داوی ذکر کیتا۔ مسئلے دے حل تئیں ایں توں پہلے پاکستان ہنگامی اقدام دے طورتے قونصل خانے دی حدود اچ رہونڑ آلے مریضاں یا طالب علماںکوں ویزے جاری رکھیسی۔ افغان وزیر خارجہ شاہ محمود قریشی کو ںافغانستان دے دورے دی دعوت ڈتی اتے انہاں قبول کرگھدی ہے۔
