اسلام آباد ۔ 25 ستمبر (اے پی پی) وفاقی وزیر اطلاعات نشریات و قومی ورثہ چوہدری فواد حسین آکھیے جو ملک دیاں اقتصادی مشکلاں دے ذمہ دار اسحاق ڈار اینڈ کمپنی ہین، ملک کوں قرضیاں دے جال اچ پھسایا گئے،ملکی معیشت نال مجرمانہ طرز عمل ڈکھایا گئے،ساڈی سوچ اے ہے جو امیراں دا بھار غیرب نہ چیسن۔منگل کوں قومی اسمبلی اچ ضمنی مالیاتی بل تے بحث ویلھے وفاقی وزیر اطلاعات و نشریات ایسٹ انڈیا کمپنی دی مثال ڈیندے آکھیا جوبالکل ایسٹ انڈیا کمپنی آلی کار 2013ءاچ مسلم لیگ (ن) دے حکومت آئی تاں اوندے کولوں وی ملک کوں ورض دے جال اچ پھساونڑ دا پورا ایجنڈا موجود ہا، جیویں ساڈے بال قرضو کالے تھیندے گین ایندی کہانی پوری قوم جانڑدی اے،بجٹ خسارہ 7.2 فیصد ھا‘ ساڈے اخراجات 2780 ارب روپے توں ودھ ہن بھل مسلم لیگ (ن) دے دور حکومت اچ حسابات جاریہ دے خسارے اچ پنج فیصد ودھارا تھئے۔ہنڑ حالت اے ہے جو ایںویلھے ساڈے کولوںڈیڈھ مہینے دے زرمبادلہ دے ذخائرہین، 2008ءاچ پیپلز پارٹی دی حکومت 13 ٹریلین دا قرض چھوڑ گئی جیہڑا مسلم لیگ ن ودھا تے پنج سالاں اچ 28 ٹریلین تئیں پجائے، مسلم لیگ ن دی ایں پالیسی پاروں کجھ لوک ارب پتی بنڑ گین اتے ایون فیلڈ اچ گھر بنڑائن،سابق وزیراعظم نوازشریف دی تڈ تے اسحاق ڈار اینڈ کمپنی ملک کوں اقتصادی مسائل اچ ولھیٹے۔ وفاقی وزیر اطلاعات آکھیے جو صرف ڈاہ سالاں اچ شہباز شریف 11 ٹریلین روپے خرچ کیتن،اج اسلام آباد ‘ لاہور اتےر ملتان میٹرو تان بنڑ گئی اے بھل بساں چلاونڑ کیتے پیسے کائنی ،اورنج ٹرین لائن تے 300 ارب روپے لائے گین جیندا قرضہ ساڈیاں نسلاں لہیسن۔ریڈیو پاکستان اچ 700 لوگ کنٹریکٹ تے کم کریندے پین،تنخواہیں کیتے پیسے کائنی، صرف پنشن کیتے 20 کروڑ روپے لوڑھ ہین،جیکوں سدھارنڑ دی اجازت کائنی۔اساں وزیراعظم عمران خان دے ویژن دے مطابق اصلاحات گھن آسوں تاں جو امیراں دا بھار غریباں کوں نہ چاونڑاں پووے۔گیس اچ ودھارا عام لوکاں کیتے نئیں۔ انہاں اپوزیشن لیڈر ولوں چارٹر آف اکانومی دی تجویز دی تعریف کیتی۔انہاں آکھیا جیہڑے لوک معیشت دی خرابی دے ذمہ وار ہین انہاں دی حمایت مکنڑی چاہیدی اے۔
