اسلام آباد ۔ 18ستمبر (اے پی پی) وزیراعظم عمران خان منگل کوں سعودی عرب اتے یو اے ای دے ڈو ڈینھ دے دورے دے روانہ تھی گن ۔ وزیر اعظم سعودی فرمانروا شاہ سلمان بن عبدالعزیز اتے ولی عہد محمد بن سلمان دی دعوت تے سعودی عرب جڈاں جو متحدہ عرب امارات دے ولی عہد دی دعوت تے یو اے ای دادورہ کریندے پن۔ وزیر خارجہ شاہ محمود قریشی، وزیر خزانہ اسد عمر، وزیر اطلاعات و نشریات چوہدری فواد حسین اتے وزیراعظم دے مشیر تجارت عبدالرزاق داﺅد وی انہاں دے نال ہن ۔ وزارت خارجہ ولوں جاری بیان دے مطابق اپنڑے دورہ سعودی عرب دے دوران وزیراعظم سعودی شاہ سلمان بن عبدالعزیز اتے ولی عہد محمد بن سلمان نال ڈو پاسے ملاقاتاں کریسن ۔سعودی شاہ ولوں وزیراعظم عمران خان دے اعزاز اچ ضیافت دا اہتمام کیتا ویسی ۔وزیراعظم دے نال وزرا اپنڑے اپنڑے ہم منصب نال ملاقاتا ں کریسن تے سانجھی دلچسپی دے امور تے گال مہاڑ کریسن ۔دورے دے دوران وزیراعظم عمران خان وزیر خارجہ دے نال اسلامی تعاون دی تنظیم (او آئی سی) دے سیکرٹری جنرل ڈاکٹر یوسف بن احمد العثمین نال وی ملاقات کریسن ۔وزیراعظم روضہ رسول تے حاضری ڈیسن تے عمر ہ ادا کریسن ۔ وزیراعظم اپنڑے وفد دے نال 19 ستمبر دی شام ابوظہبی پج ویسن جتھاں متحدہ عرب امارات دے ولی عہد محمد بن زید النیہان انہاں دا استقبال کریسن ۔ وزیراعظم متحدہ عرب امارات دے ولی عہد دی دعوت تے اے دورہ کریندے پن ۔ ڈوہیں رہنما سانجھی دلچسپی دے امور تے گال مہاڑ کریسن ۔
