اسلام آباد ۔ 31 اکتوبر (اے پی پی) وزیراعظم عمران خان عوام توں اپیل کیتی اے جو او مذہب دے ناں تے سیاست چمکاونڑ آلیاں دے ڈت اچ نہ آون، مرضی دے فیصلے گھنڑ کیتے ججاں کوں واجب القتل ، سپہ سالار کوں غیر مسلم قرار ڈیونڑ اتے فوجی جرنیلاںکوں بغاوت تے اکساونڑ دیاں گالھیں افسوسناک ہین، اے اسلام دی خدمت نئیں ملک دا نقصان اے ، اینجھے عناصر ریاست نال ٹکراونڑ توں باز راہون،ترٹ بھج تھیونڑ ڈیسوں نہ ٹریفک رُکسی،کوڑ مار تے اکسایا ویسی تاں فیدہ ملک دشمن چیسن، ریاست کوں اوں موڑ تے نہ گھن ونجو کوئی کارروائی کرنڑی پووے۔ وزیراعظم عمران خان آسیہ بی بی کیس اچ عدالت عظمیٰ دے فیصلے توں بعد ہک طبقے ولوں آونڑ آلے شدید اتے منفی ردعمل دے جواب اچ اپنڑے خصوصی خطاب اچ آکھیے جو سپریم کورٹ دے فیصلے دے ردعمل اچ استعمال کیتی ونجنڑ آلی زبان نامناسب اتے قابل افسوس اے جیں انہاں کوں مجبور کیتے جو اج قوم نال خطاب کرن۔انہاں آکھیے جو پاکستان ہکو ملک اے جیہڑا ریاست مدینہ اتے اسلام دے ناں تے بنڑیے جیندا مطلب اے جو پاکستان دا کوئی قانون قرآن و سنت دے خلاف نئین بنڑ سگدا، جج صاحبان جیہڑا فیصلہ ڈتے او قرآن و سنت اتے آئین دے مطابق اے، ہک چھوٹے طبقے ولوں عدالت عظمیٰ دے جج صاحبان دے خلاف زبان درازی ، فتوے،آرمی چیف کوں غیر مسلم آکھنڑ اتے بغاوت تے اکساونڑ ناقابل قبولاے،میڈا ایمان اے جو سلامی فلاحی ریاست دے جیہڑے مقصد کیتے پاکستان بنڑیا ہا جیکر اساں اینجھی ریاست بنڑیسوں تاں پاکستان دا کوئی مستقبل کائنی، عشق نبی توں بغیر کہیں دا ایمان مکمل نئیں تھیندا،ہالینڈ اچ گستاخانہ خاکیاں تے حکومت دا کردار ساریں دے اگو اے،خاکے بند کرائن،اے معاملہ او آئی سی اچ پہلی واری چاتے،یورپی عدالت برائے انسانی حقوق کوں وی فیصلہ ڈیونڑا پئے جونبیدی شان اچ گستاخی کرنڑ آزادی اظہار رائے نئیں۔جڈان مرضی دے فیصلے کیتے تساں اینجھے کم کرو تاں ملک کیویں چلسی؟حکومت دا کیا قصور اے؟اج جڈاں ملک معاشی بحران توں نکلنڑ آلا اے ہک نواں مسلہ کھڑا کرنڑ دی کوشش کیتی ویندی پئی اے،جیکر تہاکوں فیصلہ پسند نہ آوے تاں احتجاج کرو،سڑکاں بند کر ڈیو؟۔ وزیراعظم عوام توں اپیل کیتی جو او کہیں دے اکساونڑ اچ نہ آون،اے اسلام دی خدمت نئیں ملک دشمنی اے،کور مار تے لوکاں کوں بھڑکیسوتاں فائدہ پاکستان دشمناں کوں تھیسی۔ انہاں خبردار کیتے جو شرپھیلایا گیا تاں ریاست اپنڑی ذمہ داری پوری کریسی۔
