اسلام آباد ۔ 3 اکتوبر (اے پی پی)قومی اسمبلی ضمنی مالیاتی بل 2018ءدی منظوری ڈے ڈتی اے جیندے اچ اپوزیشن دیاں ترامیم کثرت رائے نال مستردکر ڈتیاں گین۔قومی اسمبلی اچ ضمنی مالیاتی بل تے وزیر خزانہ اسد عمربحث مکائی جیندے بعد سپیکر وزیر خزانہ کوں ضمنی مالیاتی بل تے تحریک پیش کرنڑ دا آکھیا اتے پچھیں سپیکر ایوان توں ضمنی مالیاتی بل دی شق وار منظوری گھدی۔ضمنی مالیاتی بل دی شق 2 تے اپوزیشن دے رکن سید خورشید شاہ اتے بنھاں دے مطالبے تے رائے شماری کرائی گئی جیندے حق اچ 158 اتے مخالفت اچ 120 ووٹ پین اتے اے شق ڈو کثرت رائے نال منظور کر گھدی گئی۔ضمنی مالیاتی بل دی شق 4 تے اپوزیشن رہنما ڈاکٹر نفیسہ شاہ ‘ عبدالقادر پٹیل اتے شاہدہ رحمانی دیاں ترامیم تے وزیر خزانہ مخالفت کی۔سپیکر شق چار تے رائے شماری کرائی تاں کثرت رائے نال شق 4منظور کریندے ہوئیں اپوزیشن دیاں ترامیم مسترد کرڈتیان گین۔ کلاز 5 اچ کوئی ترمیم پیش نئیں کیتی گئی۔ کلاز 6اچ شگفتہ جمانی اراکین اسمبلی دی مراعات بارے ترمیم پیش کیتی۔وزیر خزانہ آکھیا فنانس بل اچ تاں وزیراعظم اتے وزراءدیاں مراعات وی مکا ڈتیاں گین۔جیندے تے اسپیکر ولون رائے شماری دے بعد ایوان ترمیم مسترد کرڈتی ۔چھیکڑ تے وزیر خزانہ بل دی منظوری کیتے تحریک ایوان اچ پیش کیتی۔ ایوان بالا بل دی کثرت رائے نال منظوری ڈے ڈتی۔
