اسلام آباد ۔ 5 اکتوبر (اے پی پی) وزیر اعظم دے معاون خصوصی احتساب شہزاد اکبر آکھیا جو پاکستانیاں دی باہرلے ملکاں اچ ڈاہ ہزار جائیداداں دا سراغ لاتاگے، جیں تے 300 جائیداداں دے مالکان کوں نوٹس جاری کرڈتے گن ۔ لندن اچ سابق وزیر خزانہ اسحاق ڈار دے مزید ڈو فلیٹ سامنڑے آگن ۔ سانجھی قانونی معاونت (میوچل لیگل اسسٹنس) بل اتے وسل بلوور ایکٹ منظوری سانگے وختی وفاقی کابینہ اچ پیش کیتے ویسن ۔انہاں اے گال اتھاں وفاقی وزیر اطلاعات و نشریات چوہدری فواد حسین دے نال پریس کانفرنس کریندے ہوئیں آکھی ۔انہاں آکھیا کابینہ دی منظوری نال اثاثہ ریکوری یونٹ کم شروع کر ڈتے ، ایں یونٹ اچ نیب ، ایف آئی اے ، ایف بی آر سمیت بئے محکمے دے نمائندے شامل ہن ۔ ایں یونٹ برطانیہ تے دبئی اچ پاکستانیاں دیاںڈاہ ہزار توں ودھ جائیداداں دا سراغ لاتا گے ۔انہاں اچوں895 جائیداداں تے کارروائی کیتی ویسی جڈاں جو ترائے سو جائیداداں تے نوٹس جاری کر ڈتن گن ۔
