اقوام متحدہ ۔ 20 نومبر (اے پی پی) اقوام متحدہ دی جنرل اسمبلی دی کمیٹی حق خود ارادیت دے حوالے نال پاکستان ولوں پیش کیتی گی قرار داد متفقہ طور تے منظور کرگھدی۔ غیر ملکی اتے سامراجی تسلط اچ زندگی گذارنڑ تے مجبور لوکاں کوں حق خود ارادیت ڈیونڑ بارے پاکستانی قراداد دی ریکارڈ 83ملکاں حمایت کیتی ،قرارداد کوں ہنڑ آندے سال حتمی منظوری سانگے جنرل اسمبلی اچ پیش کیتا ویسی ۔قرارداد اچ ملکاں توں مطالبہ کیتا گے جو او بئے ملکاں تے علاقیں تے اپنڑے قبضے اتے فوجی مداخلت تے سارے جبر تے مبنی ساریاں کاروائیاں وختی ختم کرن ۔اقوام متحدہ اچ پاکستان دی مستقل مندوب ڈاکٹر ملیحہ لودھی ایں موقع تے اے پی پی نال گال مہاڑ کریندے ہوئیں آکھیا جو قرارداد دی منظوری ایں عزم دا اعادہ ہے جو بغیر کہیں استثنا دے اتے بشمول کشمیری تے فلسطینی عوام دے پوری دنیا اچ کہیں وی قوم دا حق خود ارادیت ناقابل تنسیخ اے ۔ انہاں ڈسایا جو اے قرار داد اقوام متحدہ دی جنرل اسمبلی دی تریجھی کمیٹی جیرھی جو سماجی، انسانی اتے ثقافتی امور متعلق ہے اچ پیش کیتی گئی تے کمیٹی اے قرار داد بغیر رائے شماری دے متفقہ طور تے منظور کرگھدی اے ۔ انہاں آکھیا جو اجوکے سال ایں قرارداد دی حمایت کرنڑ آلے ملکاں دی تعداد اچ 8 دا وادھا تھے جیرھا جو ایں گال دا ثبوت اے جو عالمی سطح تے حق خود ارادیت دی حمایت اچ ودھارا تھے ۔ قرار داد اچ حق خودارادیت کو ں بنیادی انسانی حق قرار ڈیندے ہوئیں ایندے احترام دی ضمانت ڈیونڑ تے زور پاتا گئے۔ ڈاکٹر ملیحہ لودھی ایں موقع تے آکھیا جو پاکستان اپنڑی پوری تاریخ اچ حق خود ارادیت دی حمایت دا علمبردار رہیا اے اتے اوں دنیا دے کئی حصیں اچ رہنڑ آلے لوکاں سانگے ایندے حق دی ودھ ساری حمایت کیتی اے ۔
