علامہ اقبال اتے قائداعظم دے تصورات مطابق پاکستان کوں فلاحی ریاست بناونڑ سانگے پرعزم ہسے، انشاءاللہ پاکستان اسلامی دنیا اچ فلاحی ریاست دی مثال بنڑسی، شیلٹر ہوم بنراونڑ دا منصوبہ ووٹاں سانگے کائنی، بلکہ احساس اتے رحمدلی دے جذبے پاروں شروع کیتے، کوئی وی معاشرہ اوں ویلھا تئیں مہذب نی تھی سگدا جیندے اچ اپنڑے غریب، لاچار اتے بے سہارا لوکیں سانگے رحمدلی اتے ہمدردی دے جذبات نہ ہونڑ، اج ایں منصوبے دا سنگ بنیاد فلاحی ریاست ول پاکستان داپہلا قدم ہے، وزیراعظم عمران خان دا لہور اچ غریب اتے بے سہارا لوکیں سانگے ”پناہ گاہ“ بنراونڑ دے منصوبے دا سنگ بنیاد رکھنڑدی تقریب نال خطاب

اسلام آباد ۔ 10 نومبر (اے پی پی)وزیراعظم عمران خان آکھیے جو علامہ محمد اقبال اتے قائداعظم محمد علی جناح دے تصورات مطابق پاکستان کوں فلاحی ریاست بناونڑ سانگے پرعزم ہسے، انشاءاللہ پاکستان اسلامی دنیا اچ فلاحی ریاست دی مثال بنڑسی ، شیلٹر ہوم بنڑاونڑ دا منصوبہ ووٹ بینک سانگے کائنی بلکہ احساس اتے رحمدلی دے جذبے تحت شروع کیتے، کوئی وی معاشرہ اوں ویلھا تئیں مہذب نی تھی سگدا جیندے اندر اپنڑے غریب، لاچار اتے بے سہارا لوکیں سانگے رحمدلی اتے ہمدردی دے جذبات نہ ہونڑ، اج ایں منصوبے دا سنگ بنیاد فلاحی ریاست ول پاکستان داپہلا قدم ہے، قنون دی حکمرانی یقینی بناونڑ حکومت دی ذمہ داری ہے، اگر سپریم کورٹ دے فیصلیاں تے عملدرآمد کائناںتھیسی تاں حکومت اتے ریاست کیویں چلسی ، حکومت سپریم کورٹ دے نال کھڑی ہے۔ انہاں خیالیں دا اظہار وزیراعظم ہفتہ کوں صوبائی دارالحکومت لہور اچ غریب اتے بے سہارا لوکیں سانگے ”پناہ گاہ“ بنڑاونڑ دے منصوبے دا سنگ بنیاد رکھنڑ دی تقریب نال خطاب کریندے ہوئیں کیتے۔ ایں توپہلے وزیراعظم عمران خان منصوبے داسسنگ بنیاد رکھیا جیندے بعد ملکی ترقی تے خوشحالی سانگے دعا کیتی گئی ۔ بعد اچ لہور ڈویلپمنٹ اتھارٹی ولوں وزیراعظم کوں منصوبے بارے بریفنگ وی ڈتی گئی۔ وزیراعظم عمران خان ایں منصوبہ کوں عملی جامہ پواونڑ سانگے وزیر اعلیٰ پنجاب عثمان بزدار دی کارکردگی دی تعریف کریندے ہوئیں آکھیا جو انہاں کوںوزیر اعلیٰ پنجاب بناونڑ دا فیصلہ ٹھیک ثابت تھیندا پئے،جڈاں الیکشن دے بعد میں سردارعثمان بزداردی نامزدگی کیتی تاں ایندی وڈی مخالفت تھئی کیونجو ایں توں پہلے وزارت اعلیٰ دے عہدے تے ایجھا لوکیں کوں نامزد کرنڑ دا تصور ہا، جنہاں دے وڈے وڈے محل ہونڑ، پروٹوکول نال گھمدے رہے ہونڑ اتے جنہاں دے کروڑاں روپے اچ انٹرٹینمنٹ بل ہونڑ۔ پنجاب اچ وزیر اعلیٰ کوں بادشاہ منیا ویندا رہے، اساں ایجھا وزیر اعلیٰ دی نامزدگی دا فیصلہ کیتا جیندا تعلق پسماندہ علاقے نال ہا، انہاں دے علاقے اتے گھر اچ بجلی کائنی ہائی، ایہ ایجھا علاقے ہن جتھاں اڈھائی لکھ لوکاں سانگے ہک ڈاکٹر اتے صحت دیاں سہولتاں نی ملدیاں، انہاں علاقیاں اچ پیونڑ دے صاف پانڑیں اتے بی بنیادی سہولتاں دی گھٹکی وی ہے۔ وزیراعظم آکھیا جو کہیں وی ایہ نی سوچیا جو پسماندہ اتے غریب علاقیاں اچ رہونڑ آلے لوک کیویں گزارہ کریندن۔ سردار عثمان بزدار کوں جنوبی پنجاب دی ترقی سانگے وزیراعلیٰ بنڑایا۔ وزیراعظم آکھیا جو بے سہارا، مجبور لوکیں دا ا یہ منصوبہ اساں ووٹ بینک سانگے نی بلکہ احساس اتے رحم دے جذبے نال شروع کیتے کیونجو کوئی وی معاشرہ اوں ویلھا تئیں مہذب نی تھی سگدا جیندے اچ اپنڑے غریب، لاچار اتے بے سہارا لوکیں سانگے رحمدلی اتے ہمدردی دے جذبات نہ ہونڑ۔انہاں آکھیا جو،لہور اچ کئی علاقیاں اچ لوگ مینھ اتے سردی دے ڈینھاں اچ سڑک کنارے گندگی اچ سمدن ، کہیں بندے کوں ایجھا شہریاں بارے فکر کائنی ہائی کیونجو انہاں لوکیں دا ووٹ بینک کائنی ہا ،ایں سانگے ایجھالوکیں کوں نظر انداز کیتا گیا۔ وزیراعظم آکھیا جو انہاں سوشل میڈیا تے ہک فوٹو ڈٹھی جیندے اچ ہک مزدور اپنڑے بالاں دے نال سڑک کنارے سمدا ہوئے ڈٹھا گیا، میں سمجھداں جو جیرھا انسان دے دل اچ رحم کائنی ا وہ انسان ہی کائنی، انسان جڈاں نیکی، ہمدردی اتے رحمدلی دیاںصفتاں نال کم کرنڑ شروع کریندے تاں اوہ اشرف المخلوقات بلکہ فرشتہ توں وی ایندا درجہ ودھ ویدنے لیکن جڈاں بھیڑا تھیندے تاں زناوراں توں وی بدتر ہوندے۔ وزیراعظم آکھیا جو پاکستان قائداعظم محمد علی جناح اتے علامہ محمد اقبال دے تصور اتے کوششاں دے نتیجے اچ بنڑیا، قائداعظم محمد علی جناح 20 ویں صدی دے عظیم سیاسی رہنما ہن جنہاں برصغیر پاک تے ہند سانگے ہک اسلامی فلاحی ریاست دا تصور پیش کیتا اتے اینکوں عملی طورتے بنرایا، دنیا دی پہلی فلاحی ریاست مدینہ دی ریاست ہائی۔ وزیراعظم آکھیا جو حکومت سانبھنڑ دے نال ہی حکومت کوں مشکلاں دا سامنراں کرنڑ پئے، اساکوں قرضیاں دیاں قسطاں ڈیونڑ سانگے مشکللاں دا سامنڑاںہا، حکومت دیاں کوششاں اتے اللہ دے فضل نال پاکستان ایں بحران توں باہر نکل آئے۔ وزیراعظم آکھیا جو اج ایں منصوبے دا سنگ بنیاد فلاحی ریاست ول پاکستان دا پہلا قدم ہے، ایندے بعد اساں وڈے وڈے کم کرنے ہن۔ وزیراعظم ایں موقع تے ہک چینی کہاوت داوی حوالہ ڈتا جو ہک ہزار میل دے سفر پہلے قدم توں شروع تھیندے ۔ وزیراعظم آکھیا جوانہاں شیلٹر ہوم دے منصوبے تے وزیر اعلیٰ عثمان بزدار نال گالھ کیتی تاں گالھ انہاں دی سمجھ اچ آ گئی، اساں ایہ منصوبہ ووٹ بینک سانگے نی بلکہ انسانی ہمدردی، خدا ترسی اتے رحمدلی دے جذبے نال بنڑائے، لہور شہر اچ ریلوے سٹیشن، اچھرہ، چوبرجی، داتا دربار اتے شاہدرہ ایجھا علاقے ہن جتھاں غریب لوک راہندن، اساں انہاں پنج جئیں دی نشاندہی کیتی جتھاں ا یہ شیلٹر ہوم بنرائے ویسن ۔جیرھا جدید تقاضیاں مطابق بنرائے ویسن ، پہلا شیلٹر ہوم ہک مثال ہو سی، ایں سانگے بورڈ آف گورنرز بنڑایا ویسی ، وزیر اعلیٰ پنجاب نال رل مل تے بورڈ کوں ناں ڈیسوں۔ وزیراعظم آکھیا جو گزریل 30 سال اچ ا وہ ودھ سارے ایجھا لوکیں نال ملے ہن جیرھا فلاحی اتے خیراتی کم کر یندے پن، بورڈ ایں منصوبے کوں ریگولیٹ کریسی جیرھاکھاونڑ پیونڑ اتے بئے وسائل ڈیونڑ دا جائزہ گھنسی۔ وزیراعظم آکھیا جو آندے ہفتہ 10 ڈینھاں اچ حکومت لوکیں کوں غربت توں باہر کڈھنڑ سانگے ہک ایجھا پیکج ڈیسی جیندی مثال کائناں ملسی، ایں پیکج تحت غربت مکاونڑ سانگے کم کرنڑ آلے اداریاں کوں ہک چھتری تلے لاتا ویسی۔ وزیراعظم آکھیا جو اپنڑے شہریاں کو ںغربت توں باہر کڈھنڑ سانگے چین دے تجربات توں فائدہ گھنسوں، چین توں اساں ا یہ سیکھے جو ستر کروڑ لوکیں کوں غربت توں کیویں باہر کڈھیا ویندے، ایہ پیکج اساڈی 100 ڈینھ دی کارکردگی دا اہم حصہ ہو سی۔ وزیراعظم آکھیا جو عوامی فلاح تے بہبود اتے پسماندہ، غریب طبقے سانگے اقدامات نال انہاں کوں بہوں خوشی ملدی ہے کیونجو ایجھا کماں نال ہی اللہ دی برکت آندی ہے اتے قوماں اگی تے ترقی کریندیاں ہن، سکینڈینوین ملکاں اچ ایجھا شیلٹر ہوم بنڑائے گن۔ وزیراعظم آکھیا جو تریخ اچ ایجھی سرگرمیاں مسلماناں نال جڑیاں ہوئیاں ہن ،ا یہ اساڈے تصورات ہن جنھاں تے اج مغرب عمل کریندا پئے ، انشاءاللہ پاکستان مسلم دنیا اچ فلاحی ریاست دی مثال بنڑسی۔ وزیراعظم اپنڑیں تقریر اچ منصوبے کوں عملی شکل ڈیونڑ سانگے وزیر اعلیٰ پنجاب کوں خراج تحسین پیش کیتا اتے آکھیا جو انہاں وختی شیلٹر ہوم سانگے علاقیاں داانتخاب کیتا اتے ایندے اتے پر پیش رفت کیتی۔انہاں آکھیا جو میکوںخوشی ہے جو جیویں میں کرکٹ اچ کھلاڑیاں دا انتخاب کیتا، جنہاں اچ وسیم اکرم اتے انضمام الحق جئے کھلاڑی سامنڑے آئے، انشاءاللہ سیاست اچ وی ایجھا نتیجے ملسن۔ ایں موقع تے صحافیاں دے سوالاں داجواب ڈیندے ہوئیں وزیراعظم آکھیا جو حکومت عدالت عظمیٰ دے فیصلے مطابق کم کریسی، قنون دی حکمرانی دا قیام اساڈی ذمہ داری ہے، اگر سپریم کورٹ دے فیصلیاں تے عملدرآمد کائناں تھیسی تاں حکومت اتے ریاست کیویں چلسی، حکومت سپریم کورٹ دے نال کھڑی ہے۔ شیلٹر ہوم اچ لوکیں دے رہونڑ متعلق طریقہ کار دے سوال تے وزیراعظم آکھیا جو ا وہ سمجھدن جو اتھاں پناہ سانگے آونڑ آلے سارے لوکاں کوں جاءملنڑ چاہیدی ہے کیونجو جیرھا وی ایجھی پناہ گاہ اچ آندے اوہ بہوں مجبور تے لاچار ہوندے۔ انہاں آکھیا جو ایجھا شیلٹر ہوم بنراونڑ سانگے انہاں خیبرپختونخوا اتے گورنر سندھ نال وی گالھ کیتی ہے، میں وزیراعلیٰ سندھ نال وی ایجھا شیلٹر ہوم بنراونڑ سانگے گالھ کریساں۔