اسلام آباد ۔ 31دسمبر (اے پی پی) وزیراعظم عمران خان آکھیے جو فاٹا دے انضمام شدہ علاقیاں دی تعمیر و ترقی اتے انہاں کوں بنھاں علاقیاں دے برابر گھن آونڑحکومت دی ترجیح اے،فاٹا اچ پنج لکھ خانداناں کوں ہیلتھ کارڈجنوری توں ملنڑ لگ ویسن،بلدیاتی نظام دے تیکھے نفاذ کیتے کوششاں تیز کیتاں ونجن۔ اے گالھ انہاں فاٹا دے انضمام شدہ علاقیاں دی تعمیر و ترقی بارے اعلی سطح اجلاس دی صدارت کریندے آکھی۔ اجلاس اچ وزیر خزانہ اسد عمر، گورنر خیبر پختونخوا شاہ فرمان، وزیر اعلی محمود خان، وزیر اعظم دے مشیر شہزاد ارباب، معاون خصوصی افتخار درانی، صوبائی وزیر خزانہ تیمور سلیم خان اتے بئے سینئر افسران شریک ہن۔اجلاس اچ انضمام شدہ علاقیاں اچ انتظامی امور، صحت، تعلیم، لا اینڈ آرڈر اتے ترقیاتی منصوبیاں بارے ہنڑ تئیں دی پیش رفت اتے آندے ترائے مہینے دے لائحہ عمل دا جائزہ گھدا گیا۔وزیراعظم ہدایت کیتی جو وزیراعلی، صوبائی وزرا اتے متعلقہ سیکرٹریز باقاعدگی نال انضمام شدہ علاقیاں اتے مختلف محکمیاں دا دورہ کرن اتے تعلیم وصحت دے ترقیاتی کماں دا آپ جائزہ گھنن، صوبائی کابینہ ہرمہینے ترقیاتی کماں اتے اصلاحات تے پیش رفت دا جائزہ گھنسی۔ وزیراعظم ہدایت کیتی جو انہاں علاقیاں اچ تعلیم، صحت اتے پولیس دے محکمیاں اچ خالی اسامیاں تے فوری بھرتیاں کیتاں ونجن۔
