اسلام آباد ۔ 14 دسمبر (اے پی پی) وزیر اطلاعات تے نشریات چوہدری فواد حسین آکھیے جو پاکستان ٹیلی ویژن اتے ریڈیو پاکستان کوں ہک انتظامی کنٹرول اچ گھن آونڑ کیتے اقدامات کریندے پیوں ‘ ڈوہیں اداریں دا بورڈ ہک کر ڈتے‘ ایں سال پاکستان ٹیلی وژن کوں منافع بخش ادارہ بنڑیسوں جڈاں جو ریڈیو پاکستان کوں ڈو سال اچ اپنڑے پیراں تے کھڑا کریسوں۔ جمعے کوں قومی اسمبلی اچ سوالاں دے وقفے دے دوران شاہدہ رحمانی دے سوال دے جواب اچ وزیر مملکت علی محمد خان ڈسایا جو پی بی سی دے اثاثیں دے ضمن اچ اے فیصلہ پی بی سی بورڈ آف ڈائریکٹرز کریندے جو مجاز فورم اے۔ علی محمد خان آکھیا جو پی بی سی دی عمارت کوں پٹہ تے کائنی ڈتا ویندا پیا ۔ ریڈیو پاکستان کوں ولا اپنڑے پیراں تے کھڑا کرنڑ تے اینکوں منافع بخش ادارہ بنڑاونڑ کیتے حکومت اقدامت کریسی ۔کہیں کوں بے روزگار کائناں کریسوں تاں جو گزریل دور اچ اتھاں من پسند لوکاں کوں بھرتی کیتا گیا ۔ وزیر اطلاعات و نشریات چوہدری فواد حسین آکھیا جو ریڈیو پاکستان میوزیم اچ ونج تے علم تھیسی 1960ءاچ ریڈیو دے ٹرانسمیٹر سمیت بئے آلات اساں خود بنڑیندے ہاسے تاں جو ہر چیز در آمد کیتی ویندی ہئی ۔ ریڈیو کو ں جدید خطوط تے استوار کرنڑ دے علاوہ کوئی چارہ کائنی۔ ہر سال 5 ارب 65 کروڑ حکومت ڈیندی اے ۔ ریڈیو دی آمدن 20 کروڑ روپے اے ۔ اساں ہک جامع پلان تشکیل ڈیندے پیوں ۔ ریڈیو پاکستان اتے پی ٹی وی دا بورڈ ہک کر ڈتے ۔ اگلے مرحلے اچ اینکوں ہک انتظامی چھتری تلے گھن آسوں۔ ایں سال پی ٹی وی کوں منافع اچ گھن آسوں تے اگلے ڈو سالاں اچ ریڈیو کوں وی ایں صورت حال توں کڈھیسوں۔
