اسلام آباد ۔ 4 دسمبر (اے پی پی) وفاقی وزیر ریلوے شیخ رشید احمد آکھیے جو ڈاکٹر انسانیت دی خدمت کرنڑ تے عظیم لوک ہن ‘ ڈگری توں ودھ محنت تے خلوص نال انسانیت دی خدمت کرنڑ ڈاکٹر سانگے باعث عزت اے ،باہرلے ملک رہنڑ آلے پاکستانی ڈاکٹر اپنڑے ملک دے سفیر ہن تے اتھاں انہاں دی بہوں عزت کیتی ویندی اے ۔انہاں اپنڑی بہترین ساکھ نال بین الاقوامی سطح تے پاکستان دا ناں روشن کیتے۔کالج آف فزیشنز اینڈ سرجنز دے 52 ویں کانووکیشن نال خطاب کریندے ہوئیں شیخ رشید احمد آکھیا جو انہاں کوں خوشی اے جو او بہوں معتبر لوکاں نال خطاب کریندے پن تے امید کریندن جو اپنڑی تعلیم پوری کرنڑ آلے ڈاکٹر محنت ‘ اتے دل لاتے انسانیت دی خدمت کریسن ۔انہاں آکھیا محنت کرنڑ آلیں کوں اللہ سئیں اجر ضرورڈیندے ۔ اللہ تعالیٰ انہاں دی مدد کریندے جیرھے جو اپنڑی مدد آپ کریندن ۔انہاں آکھیا جو پاکستانی ڈاکٹراں دی دنیا اچ عزت تھیندی اے جیرھا جو انہاں دی پیشہ ورانہ محنت دا نتیجہ اے ۔ انہاں آکھیا اج اتھوں 4 سو توں ودھ ڈاکٹر ڈگریاں حاصل کرتے سپیشلسٹ ڈاکٹرز بنڑ گن او اپنڑی ڈیوٹی چنگے طریقے نال کریسن ،تساڈا اصل مقصد غریب اتے مسکین لوکاں دی خدمت ہوونڑیں چاہیدی اے
