اسلام آباد ۔ 18 جنوری (اے پی پی) وزیراعظم عمران خان پاک چین اقتصادی راہداری دے تحت مختلف منصوبیں دی رفتار تکھی کرنڑ دی ضرورت تے زور ڈیندے ہوئیں آکھیے جو سی پیک منصوبہ جات دی وختی تکمیل پاکستان دے مفاد اچ ہے ،ایندے نال عوام سانگے ودھ سارے سماجی تے اقتصادی موقع پیدا تھیسن جڈاں جو فیصلہ کیتے گے جو سی پیک ایڈوائزری کونسل قائم کیتی ویسی ۔انہاں اے گال اتھاں جمعے کوں سی پیک منصوبہ جات تے پیشرفت جائزہ اجلاس دی صدارت کریندے ہوئیں آکھی ۔اجلاس اچ صنعتی ترقی، خصوصی اقتصادی زونز، ایم ایل۔1 منصوبہ، زرعی، سماجی و اقتصادی ترقی، بنیادی ڈھانچہ اتے گوادر دی ترقی دے شعبہ جات اچ پاک چین تعاون تے پیشرفت دا جائزہ گھدا گیا ۔وزیراعظم آکھیا جو پاکستان اپنڑے عوام کوں غربت اچوں کڈھنڑ سانگے چین دے تجربے توں فائدہ چا سگدے انہاں آکھیا صنعتی تے زرعی شعبے اچ پاک چین تعاون ملک دے انہاں شعبیں اچ صلاحیت کوں عملی جامہ پواونڑ اچ معاون تھی سگدے ۔ وزیراعظم چیئرمین سرمایہ کاری بورڈ کوں ہدایت کیتی جو خصوصی اقتصادی زونز دی وختی ترقی بارے جامع سفارشات چار ہفتے دے اندر پیش کیتیاں ونجن ۔ وزیراعظم چیئرمین سرمایہ کاری بورڈ کوں ہدایت کیتی جو ایں اہم مرحلے تے اگی تے ودھدے ہوئے کردار ادا کرن کیوں جو چین توں بہوں ساری نجی سرمایہ کاری متوقع اے ۔
