اسلام آباد ۔ 19 فروری (اے پی پی) صدرمملکت ڈاکٹرعارف علوی پاکستان اچ 20 ارب ڈالر دی سرمایہ کاری پیکج اتے مفاہمت دی دستاویزات تے دستخط تے سعودی عرب دا شکریہ ادا کریندے ہوئیں آکھیے جو پاکستان اتے سعودی عرب وچال تعلق اتے دوستی دل آلی تے انمول ہے ‘ سعودی عرب ہک ایجھے وقت اچ پاکستان اچ سرمایہ کاری کیتے اگی تے ودھیے جڈاں اساکوں سرمایہ کاری دی ضرورت ہئی ، صنعتی شعبہ، گوادر اچ ریفائنری پراجیکٹ، معدنیات، سیاحت، مصنوعی ذہانت سمیت کئی شعبے ہن جتھاں سعودی عرب سرمایہ کاری دے موقع توں فائدہ چا سگدے ، دنیا سعودی عرب دے ولی عہد شہزادہ محمد بن سلمان دے وژن 2030ءدے تحت مملکت اچ اصلاحات دے عمل کوں دلچسپی نال ڈیکھدی پئی اے ، پاکستان دے چین اتے سعودی عرب نال تعلقات کاروباری کائنی بلکہ دوستی دے رشتے ہن ‘ پاکستان دے سارے ادارے وزیراعظم عمران خان دی قیادت اچ بدعنوانی دے خلاف حکومتی وژن دے مطابق صف آراءہن۔ صدر مملکت اے گال سعودی عرب دے اخبار عرب نیوز کوں خصوصی انٹرویو ڈیندے ہوئیں آکھی۔ انہاں آکھیا اعتدال اتے جدیدیت دے پاسے نویں سعودی سمت بہوں اہمیت رکھیندی اے ، میں سمجھداں جو ولی عہد شہزادہ محمد بن سلمان دی قیادت اچ سعودی عرب کوں اوپن رکھنڑدا عمل اہمیت دا حامل اے، ایندا جائزہ گھدا ویندا پئے تے پوری دنیا اچ ایندی تعریف تھیندی پئی اے ۔صدر مملکت انتہا پسندی دے خلاف سعودی عرب دی جنگ دی تعریف کیتی تے آکھیا جو اے مہم اتنہا پسندی تے جہل پسندی دے خلاف پاکستان دی جنگ وانگوں اے اے گال اہم اے جو لوکاں کوں سمجھیا ونجے کجھ وقت انہاں کوں اسلامی تعلیمات دے حوالے نال غلط معلومات ڈے تے انہاں کوں گمراہ کیتا ویندے ،ایں ایشو تے پاکستان تے سعودی عرب اچ مماثلت پاتی ویندی اے ۔صدر مملکت آکھیا جو سعودی عرب کوں جدید بنڑاونڑ دی وجہ نال لوک انتہا پسندی توں پرے تھیندے پن ،اے عمل انہاں کوں بہتر زندگی گزارنڑ کیتے موقع فراہم کریندا پئے ،پاکستان وی ایجھے اہداف رکھیندے ۔ڈاکٹر عارف علوی آکھیا جو معیشت کوں متنوع بنڑاونڑ سعودی عرب دے وژن 2030دا حصہ اے ،ایندے کیتے بہتر سرمایہ کاری کرنڑ آلیاں جہیں ضروری ہن ، پاکستان ایں ضمن اچ اہم مقام رکھیندے کیوں جو ڈوہیں ملکاں اپنڑے ملکاں کوں اوپن رکھنڑ بارے پالیسیاں تے گامزن ہن ، پاکستان دی حکومت غیرملکی سرمایہ کاراں کیتے بہوں سہولتاں ڈتن ، اساں عالی اتے بالخصوص سعودی سرمایہ کاراں کوں یقین ڈویندوں جو سرمایہ کاری کوں پورے تحفظ دی ضمانت ڈتی ویسی۔ صدرمملکت آکھیا جو سعودی عرب دے ولی عہد دے بدعنوانی دے خلاف مہم وانگوں پاکستان وی بدعنوانی دے خلاف اقدامات کریندا پئے، 1996ءاچ پاکستان تحریک انصاف دے قیام نال ہی اساڈا مقصد بدعنوانی دے خلاف جنگ اے کیوں جو اساں سمجھدوں جو پاکستان اچ بہوں سارے مسلیں دا تعلق بدعنوانی توں اے ، معیارزندگی اچ تنزلی، غربت اچ ودھارے سمیت بہوں سارے مسلے کرپشن نال جڑیے پن ، سعودی فرمان رواءشاہ سلمان بن عبدالعزیز اتے ولی عہد شہزادہ محمد بن سلمان بدعنوانی دے حوالے نال سخت موقف اپنائے ، وزیراعظم عمران خان پاکستان اچ بدعنوانی دے خلاف ایں نوعیت دے اقدامات کیتن، اج پاکستان دے سارے ادارے وزیراعظم عمران خان دی قیادت اچ بدعنوانی دے خلاف حکومتی وژن دے مطابق صف آراءہن، اے ہک حقیقی جنگ اے تے میں سمجھداں جو این جنگ اچ کامیابی ملسی ۔ صدر مملکت بدعنوانی دے خلاف چین دی کامیابی دا حوالہ ڈیندے ہوئیں آکھیا جو پاکستان دے چین نال چنگے تعلقات ہن ، بدعنوانی دے خلاف موجودہ حکومت دے اقدامات عالمی سرمایہ کاراں اچ تحفظ دا احساس پیدا کر ڈتے ۔صدر مملکت آکھیا جو اساں حرمین شریفین اتے سعودی عوام کیتے کوئی وی خطرہ پاکستان تے پاکستان دے عوام کیتے خطرہ سمجھدوں ۔صدر آکھیا جو صنعتی شعبہ ، گوادر اچ ریفائنری پراجیکٹ، معدنیات، سیاحت، مصنوعی ذہانت سمیت کئی شعبے ہن جتھاں سعودی عرب سرمایہ کاری دے موقع توںفائدہ چا سگدے ۔ چین پاکستان اقتصادی راہداری دا ذکر کریندے ہوئیں صدر مملکت آکھیا جو ڈوہیں ملکاں اپنڑے قیام توں گھن تے ہنڑ تئیں دوست ملک ہن ، چین اتے پاکستان نیڑے دے یار ہن ڈوہیں ملکاں وچال یاری 1950ءاتے1960ءدے عشرے توں قائم اے۔
