اسلام آباد ۔ 27 فروری (اے پی پی) چیئرمین سینیٹ محمد صادق سنجرانی او آئی سی دے ممبر ملکاں دے پارلیمان دے سربراہاں،سپیکرز اتے پریذائڈنگ آفسراں کوں بھارتی جارحیت دے خلاف خط لکھے۔ سینیٹ سیکرٹریٹ مطابق چیئرمین سینیٹ خط اچ لکھے جو ہزاراں معصوم کشمیری مسلمان بزرگاں، تریمتیں اتے بالاں کوں قتل کیتا گئے اتے ودھ سارے لوکیں کوں پیلٹ گن نال معذور کیتا گئے۔ انہاں خط اچ مطالبہ کیتے جو او آئی سی اجلاس اچ شرکت سانگے بھارت کوں ڈتا گیا کانڈھا واپس گھدا ونجے ۔ بھارت کوں ڈتے گئے کانڈھانال پاکستانی عوام اتے پارلیمنٹ دے منتخب نمائندیاں دا دل ڈکھے ۔ خط اچ لکھا گئے جواو آئی سی مقبوضہ کشمیر اچ معصوم شہریاں تے تھیونڑ آلے مظالم تے ہمیشہ تریخی موقف اختیار کیتے۔ دنیا دے کہیں وی خطے اچ مسلمان تکلیف اچ ہونڑ تاں جغرافیائی حدود کوں ہک پاسے رکھ تے سارے مسلمان ایندی تکلیف کوں محسوس کریندن۔ بھارتی مقبوضہ کشمیر اچ مسلماناں تے تھیونڑ آلے مظالم کو ں اساں نظر انداز نی کرسگدے۔ صادق سنجرانی خط اچ لکھے جو بھارتی مقبوضہ کشمیر اچ بھارتی افواج دے ہتھوں 70 سال توں ریاستی دہشت گردی، ظلم اتے تشدد دا نشانہ بنڑن آلے کشمیریاں تے تھیونڑ آلیاں انسانی حقوق دی خلاف ورزیاں کوں عالمی برادری دے سامنڑے پیش کیتا ونجے۔ ہزاراں معصوم کشمیری مسلمان ،جنہاں اچ بزرگ ،تریمتیں اتے بالاں کوں قتل کیتا گئے۔ بے شمارلوکیں کوں پیلٹ گن نال معذور کرڈتا گئے۔ صادق سنجرانی آکھیے جو بھارت کشمیریاں دا حق خودارادیت نی ڈیندا پیا ،جیرھا حق اقوام متحدہ دی سلامتی کونسل دی قرارداداں انہاں کوں ڈتا ہوئے۔ پاکستان کشمیریاں دی آزادی سانگے سفارتی ،اخلاقی اتے سیاسی حمایت جاری رکھی ہوئی ہے۔ انہاں لکھے جو ایں گالھ وڈی اہم ہے جو اسلامی ملکاں اتے او آئی سی ہمیشہ بھارتی مقبوضہ کشمیر اچ انسانی حقوق دی خلاف ورزیاں تے تشویش دا اظہار کیتے۔ صادق سنجرانی موقف لکھے جو او آئی سی دے رکن ملک بھارتی کانڈھا واپس گھنڑ سانگے اپنڑاں کردار ادا کرن۔
