اسلام آباد۔21مارچ(اے پی پی)ملائشیا دے وزیراعظم مہاتیر محمد اج پاکستان پجدے پین جتھاں او ترائے ڈینہہ دے دورے اچ صدر وزیراعظم نال ملاقات توں علاوہ یوم پاکستان دی تقریب اچ بطور مہمان خصوصی شرکت کریسن۔دفتر خارجہ موجب ملائیشیا دے وزیر اعظم ڈاکٹر مہاتیر محمد 21 توں 23 مارچ تئیں پاکستان دا ترائے ڈینہہ دادورہ کریندے پین۔انہاں کوں ایں دورے دی دعوت وزیراعظم عمران خان ڈتی ہئی۔ملائیشن وزیر اعظم مہاتیر محمد 23 مارچ کوں یوم پاکستان پریڈ دے مہمان خصوصی ہوسن۔ڈاکٹر مہاتیر محمددے نال وڈیاں وپاری شخصیات سودھا ملائشیا دا اعلیٰ سطح وفد وی ہوسی ۔ مہاتیر محمد صدر مملکت ڈاکٹر عارف علوی اتے وزیر اعظم عمران خان نال ملسن اتے ایں دوران وفد دی سطح تے وی ملاقاتاں تھیسن۔ انہاں ملاقاتاں اچ پاکستان دے آٹو موبائل اتے ٹیلی کمیونکیشن سیکٹرز اچ سرمایہ کاری، ڈوہاں ملکاں وچال برادرانہ تعلقات کوں بیا ودھاونڑ،عوامی مفاد سانگے اقتصادی، تجارتی، سرمایہ کاری اتے دفاعی تعلقات ودھاونڑ کیتے معاملیاں تے گالھ مہاڑ کیتی ویسی۔
