کولمبو ۔ 22 اپریل (اے پی پی)سری لنکا اچ دہشتگردحملے اچ ہلاک تھیونڑ آلے لوکاں دی تعداد ودھ تے 290تھی گئی اے ،پولیس 24مشتبہ لوکاں کوں گرفتارکر گھدے۔ذرائع دے مطابق سری لنکا اچ اتوار کوں مسیحی تہوار ایسٹر دے موقع تے تھیونڑ آلے دھماکیں اچ ہلاک تھیونڑ آلے لوکاں دی تعداد 290 تئیں پج گی اے جڈاں جو قریباً 500 لوک زخمی ہن۔مقامی پولیس دے مطابق انہاں حملیں دے بعد ہنڑ تئیں 24 لوکاں کوں حراست اچ گھدا گے لیکن سری لنکن حکومت حالی تئیں انہاں حملیں کیتے کہیں گروپ کوں ذمے وار قرار کائنی ڈتا تے نہ ہی کہیں ایندی ذمے واری قبول کیتی اے ۔انہاں دھماکیں دے بعد ملک اچ کرفیو نافذ کر ڈتا گئے ہئی اینکوں سنوار دی سویل 6وجے ختم کر ڈتا گئے۔اتوار دی سویل انہاں دھماکیں اچ کولمبو سمیت ترائے شہراں اچ ہوٹلاں تے ترائے گرجا گھراں کوں نشانہ بنڑایا گیا تے ہلاک شدگان اچ مقامی باشندیں دے علاوہ غیر ملکی وی شامل ہن ۔ 2009 اچ سری لنکا اچ خانہ جنگی دے خاتمے دے بعد ملک اچ دہشت گردی دی اے ساریں توں وڈی تے مہلک کاروائی اے ۔سری لنکا دے وزیرِاعظم رانیل وکرماسنگھے آکھیے جو ملک اچ سیکورٹی دے ذمے واراں کوں ممکنہ حملیں بارے اطلاع ہئی ۔انہاں آکھیے جو ایں امر دی تحقیقات تھیونڑیں چاہیدی اے جو ممکنہ حملیں بارے انٹیلی جنس رپورٹس تے کاروائی کیوں کائنی کیتی گئی ۔
