اسلام آباد ۔ 30 اپریل (اے پی پی) وفاقی وزیر منصوبہ بندی تے ترقی مخدوم خسرو بختیار آکھیے جو موجودہ حکومت سی پیک دے مغربی روٹ کوں ترجیح ڈیندی پئی ہے ، ایندے نال ملک دے پسماندہ علاقے ملک دے باقی علاقیاں نال جڑ ویسن ، کاشغر کو ں گوادر بندرگاہ نال جوڑن سانگے مغربی روٹ تے کم تھیندا پئے۔ منگل کوں سینٹ اچ سینیٹرز عثمان کاکڑ، جہانزیب جمالدینی اتے میر کبیر شاہی دے سوالاں دے جواب اچ انہاں آکھیا جو 29 مارچ 2019ءکوں وزیراعظم کوئٹہ ۔ ژوب سیکشن داافتتاح کر ڈتا ہائی۔ ڈی آئی خان ۔ ژوب سیکشن دے پی سی ون دی ایکنیک 12 اپریل 2017ءکوں منظوری ڈتی۔ انہاں آکھیا جو ڈی آئی خان ۔ ہکلہ روڈ دا50 فیصد کم مکمل تھی گئے۔ موجودہ حکومت سی پیک دے مواقع کوں ودھیندی پئی ہے۔ اساں سماجی ترقی اتے ہنر مندی دے ودھارے سانگے توجہ ڈتی گئی ہے۔ گوادر اچ عالمی معیار دا ایئر پورٹ بنڑایا ویندا پئے۔ انہاں آکھیا جو مالی مشکلات دے باوجود ژوب توں کوئٹہ تئیں 300 کلو میٹر لمبی روڈ شروع تھی گئے ۔ سکھر توں حیدر آباد لنک تے 2 ارب ڈالر دی سرمایہ کاری دی ضرورت ہے۔ اساں ایہ منصوبہ بی او ٹی دی بنیاد تے مکمل کرنڑ چاہندوں۔
