اسلام آباد ۔ 10 مئی (اے پی پی)وزیر خارجہ شاہ محمود قریشی آکھیے جو بھارت چاہندے جو پاکستان نال معاملات اچ کشیدگی برقرار رہے حالانکہ پاکستان دا پلوامہ حملے نال کوئی تعلق کائناں ہئی،پاکستانی قیدیاں دی رہائی کیتے پاکستان خیر سگالی دے طورتے 360بھارتی قیدیاں کوں رہا کیتے ۔جمعے کوں قومی اسمبلی دے اجلاس اچ ماہی گیراں دیاں بھارتی جیلاں توں رہائی دے حوالے نال ہک توجہ مبذول نوٹس تے گال کریندے ہوئیں وزیر خارجہ شاہ محمود قریشی آکھیا جو اساڈے ماہی گیر یا غلطی نال سرحد پار کرنڑ آلے قیدیاں کوں بازیاب کراونڑ اساڈا ہدف اے ۔دفتر خارجہ بھارت اچ اپنڑے ہائی کمیشن دے ذریعے ایں معاملے کوں مسلسل چاتے ۔ اساں ایں سلسلے اچ قانونی امداد دی فراہمی سمیت قونصلر رسائی دیاں کوششاں کیتن ۔ قیدیاں دی تصدیق دا عمل ڈوہیں پاسوں تھیندے۔ اے انسانی معاملہ اے۔ بہوں سارے ماہی گیر روزگار کیتے ویندن ۔ ہندوستان چاہندے جو معاملات اچ کشیدگی برقرار رہے ۔پاکستان دا پلوامہ حملے نال کوئی تعلق کائناں ہئی جیں کوں دنیا وی من گھدے ۔اساڈا مقصد جھیڑا گھٹ کرنڑ اے ۔ اساں بھارتی پائلٹ کوں خیر سگالی دے طور تے چھوڑ ڈتے ۔اساں360قیدیاں کوں اخلاقی انسانی تے خیر سگالی طور تے رہا کیتے ۔اساڈا مقصد بھارت تے دباﺅ پاونڑ تاں جو او پاکستانی قیدیاں کوں رہا کرنڑ تے مجبور تھی ونجے ۔ دفتر خارجہ اتے بھارت اچ پاکستانی ہائی کمیشن ایں معاملے تے مکمل تعاون کریسی ۔
