اسلام آباد ۔ 2 مئی (اے پی پی) وزیر مملکت ریونیو حماد اظہر آکھیے جو ٹیکس ادائیگی دے حوالے نال ہک اینکرغلط اعداد و شمار پیش کیتن‘ او ایں ایوان دے ساریں توں ودھ ٹیکس ڈیونڑ آلے ارکان اچ شامل ہن۔اگر اوں اینکر ایں گال تے معافی نہ منگی تاں انہاں کوں ہتک عزت دا نوٹس ڈیساں ،انہاں آکھیا اجوکے سال ہک کروڑ 24 لکھ روپے دا ٹیکس ڈتے ۔خمیس کوں قومی اسمبلی اچ ذاتی وضاحت تے وزیر مملکت حماد اظہر ڈسایا جو ایں ہاﺅس اچ ساریں توں ودھ ٹیکس ڈیونڑ آلے ارکان اچ شامل ہاں ، میں بارے ہک اینکر غلط اعداد شمار ڈتن۔میں اجوکے سال ہک کروڑ 24 لکھ ‘ پچھلے سال ہک کروڑ 25 لکھ اتے ایندے توں پچھلے سال 80 لکھ ٹیکس ڈتا، اگر اوں اینکر ایندے تے معذرت نہ کیتی تاں ایں تے ہتک عزت دا دعویٰ اتے اے معاملہ پیمرا اچ گھن ویساں ۔ میں تے نجیب ہارون ڈو ایجھے ارکان ہوں جیرھے کوئی ٹی اے ڈی اے اتے تنخواہ کائنی گھندے۔ مسلم لیگ (ن) دے رکن شیخ فیاض الدین آکھیا جو او انہاں توں ودھ ٹیکس ڈیندن جیں تے حماد اظہر آکھیا جو میں اے کائنی آکھیا جو میں ساریں توں ودھ ٹیکس ڈینداں میں اے آکھیے جو میں ساریں توں ودھ ٹیکس ڈیونڑ آلے ارکان اچ شامل ہاں ۔
