اسلام آباد ۔ 17 جون (اے پی پی)صدر مملکت ڈاکٹر عارف علوی نال سنوار کوں ارجنٹائن دے سبکدوش تھیونڑ آلے سفیرآئیون ایونسیوچ چھیکڑی ملاقات کیتی۔ایں موقع تے صدر عارف علوی دا آکھنڑ ہا جوپاکستان اتے ارجنٹائن وچال بین الاقوامی فورمزاتے اہم عالمی تے علاقائی امور سانگے ہکو جئے خیالیں تے مبنی یاری خوشگوار تعلقات نال جڑی ہوئی ہے۔انہاں آکھیا جو ڈوہائیں ملکاں دے عوام دے مفادسانگے تعلقات اتے سانجھی تجارت کوں بیا ودھارونڑ دی ضرورت ہے۔ انہاں آکھیاجو پاکستان دامنفرد محل وقوع اتے سرمایہ کار دوست ماحول ارجنٹائن دے کاروباری لوکیں سانگے شاندار سرمایہ کاری دے مواقع پیش کریندے۔انہاں آکھیا جو تیل تے گیس لبھنڑ، زراعت، توانائی سمیت مختلف شعبیں دے نال نال پاک۔چین اقتصادی راہداری دے منصوبیں دی وجہ نال پاکستان دی سرمایہ کار دوست پالیساں توں فائدے گھدے ونج جا سگدن۔ انہاں امید ظاہر کیتی جو پاکستان اتے جنوبی مشترکہ منڈی ”مرکوسر“ وچال ترجیحی تجارتی معاہدے تے دستخط سانگے ارجنٹائن چنگی مدد کریسی۔ایں موقع تے ارجنٹائن دے سفیر پاکستان اچ اپنڑے قیام دوران چنگا تعاون تے پاکستانی حکومت اتے عوام دا شکریہ اداکیتا۔انہاں امید ظاہر کیتی جو مستقبل اچ ڈوہائیں ملکاں وچال سانجھا تعلقات بئے پکا تھیسن۔
