اسلام آباد ۔ 09 اگست (اے پی پی) وفاقی وزیر قانون و انصاف ڈاکٹر بیرسٹر فروغ نسیم آکھیے جو بھارت مقبوضہ کشمیر کوں ونڈ تے اقوام متحدہ دیاں قرارداداں تے شملہ معاہدے دی خلاف ورزی کیتی اے ، پاکستان بھارت دے ایں اقدام دے خلاف قانونی اتے سفارتی سمیت سارے آپشن استعمال کریسی ۔اے گال انہاں اے پی پی نال خصوصی گال مہاڑ کریندے ہوئیں آکھی اے پاکستان ہمیشہ کشمریاں دی سیاسی ، اخلاقی تے سفارتی حمایت کیتی اے ۔ انہاں آکھیا جو بھارت مقبوضہ کشمیر اچ ظلم کریندا کھڑے تے انسانی حقوق دیاں سنگین خلاف ورزیاں اچ ملوث اے ۔انہاں آکھیا جو کشمیر متعلق بھارت دا اجوکا اقدام اقوام متحدہ دیاں قرارداداں اتے منشور دے خلاف اے۔ اقوام متحدہ دی قرار داد دے مطابق کوئی وی ملک جبری طور تے کہیں علاقے دا اپنڑے رلے الحاق یا انضمام نی کرسگدا۔ بھارت اجوکے اقدام نال اقوام متحدہ دی مذکورہ قرارداد دی خلاف ورزی کیتی اے ۔ انہاں آکھیا وزیراعظم عمران خان ایں مسئلے دے حوالے نال خصوصی کمیٹی تشکیل ڈتی اے جیرھی جو مختلف سطح تے اپنڑاں کردار ادا کریندی پئی اے اتے اے کمیٹی مشاورت نال بھارتی اقدام دے خلاف سفارتی اتے بئے اقدامات دے حوالے نال اپنڑیاں تجویزاں پیش کریسی ۔
