اسلام آباد ۔ 14 ستمبر (اے پی پی)وزیر اعظم عمران خان بھارت نال گالھ مہار دے کہیں وی امکان کوں مسترد کریندے آکھیے جو آرٹیکل 370اتے 35اے دی تنسیخ دے بعد بھارت نال مذاکرات دا سوال ہی پیدانئیں تھیندا، نسل پرست اتے فاشسٹ بی جے پی حکومت پاکستان کو ں ڈیوالہ کرنڑ اتے ایف اے ٹی ایف دی بلیک لسٹ اچ رلاونڑ دی کوشش اچ لگی ہوئی اے،مودی دی غلطی نال ڈو جوری طاقتاں آمنڑے سامنڑے آگین بھل پاکستان جنگ اچ پہل نہ کریسی،امریکا طالبان مذاکرات دی منسوخی تے افسوس اے،امید ڈوہیں افغانستا ن اتے پورے خطے اچ امن اتے خوشحالی دے مقصد کیتے ول مل باھسن۔اے گالھ انہاں الجزیرہ ٹی وی کوں ڈتے گئے ہک انٹروی اچ آکھی۔ انہاںا ٓکھیا جومیں وزارت عظمیٰ سنبھلیندے ہی بھارت کوں مذاکرات دی دعوت ڈتی ہئی بھل مودی حکومت دا پاکستان کوں نقصان پچاونڑ دا ایجنڈا سمجھیندے ہوئے مذاکرات توں ہتھ چھک گھدے،مقبوضہ کشمیر بارے مودی دے غلط اقدامات توں بعدمذاکرات دی کوئی راہ نئیں بچی،کیوں جو بھارت اپنڑے ملکی آئین ہی نئیں اقوام متحدہ دیاں قرارداداں اتے بین الاقوامی قوانین کوں لتاڑیے۔انہاں آکھیے جو میں اقوام متحدہ دی جنرل اسمبلی دے اجلاس اچ مسئلہ کشمیر ، بھارت و یورپ اچ اسلامو فوبیا اتے موسمیاتی تبدیلیاں بارے ڈسیساں۔وزیراعظم آکھیے بھارت ولوں مقبوضہ کشمیر اچ مظالم دی انتہا، کشمیریاں دی نسل کشی اتے مسولینی وہٹلر دے نظریات اپناونڑتوں بعد مقبوضہ کشمیر اچ 8ملین مسلمان محصور ہین،خدشہ اے جو بی جے پی حکومت مقبوضہ کشمیر اچ اپنڑے یکطرفہ اتے غیر قانونی کماں توں توجہ ہٹاونڑ کیتے پلوامہ آلی کار کوئی فلیگ آپریشن کر سگدے،پاکستان امن چاہندے، اساں کشمیر دے معاملے تے ہر عالمی فوم تے ویندے پئے ہیں تاں جو اے مسلہ تیکھے پر امن طریقے نال حل تھیوے،پاکستان جنگ اچ پہل نہ کریسی جیکر بھارت اینجھی کوئی حرکت کیتی تاں اساں کیویں چپ باھسوں، ڈو ایٹمی طاقتاں سامنڑے آیاں تاں ایندے سنگین نتیجے نکلسن۔انہاں آکھیے جو حکومت ملکی معیشت دی بحالی،کرپشن مکاونڑ،امن اتے خوشحالی کیتے اقدامات کیتن، جیندے چنگے نتیجے آندے پین۔
