اسلام آباد ۔ 28 نومبر (اے پی پی) کابینہ دی اقتصادی رابطہ کمیٹی (ای سی سی )کنڑک دی گھٹو توں گھٹ امدادی قیمت 1365 روپے فی من مقرر کرنڑ اتے مالی سال دی پہلی سہ ماہی کیتے نیپرا دی منظور شدہ 15 پیسے فی یونٹ سہ ماہی اضافہ اچ 11پیسے فی یونٹ اضافی وصولی دے نوٹیفکیشن دی منظوری ڈتی اے،ای سی سی اگو تے بجلی دے مل دے توطریقہ کار کوں بیا سوکھا کرنڑ کیتے مشیر خزانہ و محصولات ڈاکٹر عبد الحفیظ شیخ دی سربراہی اچ ہک کمیٹی بنڑاونڑ دا وی اعلان کیتے ۔اجلاس اچ ملک دے کجھ علاقیاں اچ کنڑک دی پیداواری لاگت 1349فی منڑ پجنڑ اتے کابینہ و قومی اسمبلی دی خصوصی کمیٹی برائے زرعی مصنوعات دی سفارشات اتے کسان تنظیماں ولوں فیڈ بیک سانگے کنڑک دی 1350 روپے فی منڑ امدادی قیمت دا جائزہ گھدا گئے اتے کنڑک دے مل اچ ودھارے داافراط زر اتے مالی بھار دے ودھارے تے اثر سودھابئے معاملیاں تے کنڑک دا امدادی مل 1365 روپے فی منر کرنڑ دی منظوری ڈتی گئی۔پہلی مالہ سہ ماہی اچ بجلی دے کل ترائے کروڑ صارفین اچوں 300 یونٹس ماہانہ استعمال کرنڑ آلے ڈو کروڑ گھریلوصارفین تے نیپرا دی منظور شدہ 15 پیسے فی یونٹ سہ ماہی اضافہ اچ 11پیسے فی یونٹ اضافی وصولی دے نوٹیفکیشن دا اطلاق نہ تھیسی جڈاں جو باقی ہک کروڑصارفین اچوں 60لکھ صارفین کیتے 7پیسے فی یونٹ دا ودھارا تھیسی۔اجلاس نیشنل پاور پارکس مینجمنٹ کمپنی دی نجکاری بارے وزارت توانائی دی سفارشات دا جائزہ گھدا۔ اجلاس وزرات صنعت و پیداوار دی تجویز تے فولاد اتے لوہے دی پیداواردے ودھارے اتے مقامی لوڑھ کیتے پالیسی فریم ورک بنڑاونڑ سانگے وزیر منصوبہ بندی،ترقی و اصلاحات اسد عمردی اگوانڑی اچ ہک بین الوزارتی کمیٹی بنڑائی اے۔ای سی سی یوٹیلٹی سٹور ز کارپوریشن کوں سبسڈی اتے غریب طبقے کوں سستے مل اٹا،گھیو،چاول،کھنڈ اتے دالاں ڈیونڑ کیتے چھی ارب روپے دی ٹیکنکل سپلیمنٹری گرانٹ ڈیونڑ دی تجویز تے یوٹیلٹی سٹورز کارپوریشن دے ایم ڈی کوںجامع حکمت عملی بنڑاتے ای سی سی کوں پیش کرنڑ دی ہدایت کیتی۔
