واشنگٹن۔ 14نومبر(اے پی پی) امریکی صدر ڈونلڈ ٹرمپ اتے ترک صدر رجب طیب اردوان دی ملاقات اچ دفاع اتے تجارت دے شعبیں اچ تعاون سمیت مختلف علاقائی اتے عالمی امور تے گال مہاڑ کیتی ۔ذرائع ابلاغ دے مطابق ڈوہیں سربراہان دی ملاقات دا مقصد نیٹو اتحادیاں وچال ودھدی ہوئی نااتفاقی کوں مکاونڑاں ہئی، خاص طور تے ترکی دی شام بارے پالیسی اتے روسی دفاعی میزائل نظام دی خریداری دا معاملہ سرفہرست رہیا۔ایں موقع تے صدر ٹرمپ ڈوہیں ملکاں وچال متنازعہ امور کوں ہک پاسے کریندے ہوئیں خود کوں ترک صدر رجب طیب اردوان دا مداح قرار ڈتا تے آکھیا جو اساں ہک لمبی مدت توں ہک ڈوجھے دے یار رہیوں ،اساں ہک ڈوجھے دے ملکاں بارے جانڑدوں تے اپنڑے حالات کوں سمجھدوں ۔انہاں آکھیے جو اردوان اتے انہاں دی ذال امینہ دی نہ صرف اپنڑے ملک اچ بلکہ خطے اچ وی بہوں عزت کیتی ویندی اے ۔صدرٹرمپ آکھیا جو ترکی ولوں روسی ایس 400 دفاعی میزائل نظام دی خریداری دے معاملے تے وی گال تھئی۔ انہاں آکھیے جو ڈوہیں ملکاں 100 ارب ڈالر دے تجارتی سمجھوتے تے گال مہاڑ کریسن ۔امریکہ اتے ترکی تجارتی تعلقات کوں ودھاونڑ چاہندن ۔ایندے توں پہلے وائٹ ہاوس پجنڑ تے صدر ٹرمپ ترکی دے صدر رجب طیب اردوان دا استقبال کیتا۔ اوول آفس اچ ترک صد ر دے رلے میڈیا نال گال مہاڑ کریندے ہوئیں صدر ٹرمپ آکھیے جو اساکوں ڈوجھیں دیاں سرحداں بارے تشویش کائنی بلکہ اساں اپنڑیاں سرحداں بارے فکر مند ہوں ۔
