اسلام آباد ۔ 5 نومبر (اے پی پی) حضور نبی پاک ﷺ دے جمنڑے دے ڈینھ دے سلسلے اچ بین الاقوامی رحمت اللعالمین کانفرنس اتوار 10 نومبر کوں وفاقی دارالحکومت اسلام آباد اچ تھیسی، اجوکے سال کانفرنس دا موضوع ” ریاست مدینہ اتے جدید اسلامی ریاست دا تصور تعلیمات نبوی دی روشنی اچ” رکھیا گے ۔ وزارت مذہبی امور کانفرنس کراونڑ کیتے انتظامات کوں حتمی شکل ڈے ڈتی اے ۔کانفرنس دے عنوان دے تحت پورے ملک دیاں یونیورسٹیاں، کالج، دینی مدارس ، علماءاتے مشائخ تحقیقی مقالہ جات مقابلے کیتے بھجوائن۔ ایندے علاوہ سیرت اتے نعت رسول مقبول تے وی قومی اتے علاقائی زباناں اچ کتاباں وی مقابلے اچ شامل کیتیاں گن جیں تے پہلے ، ڈوجھے تے تریجھے نمبر تے آونڑ آلیں کوں انعام ڈتے ویسن ۔ کانفرنس دے افتتاحی سیشن دی صدارت وزیر اعظم عمران خان جڈاں جو صدر ملکت ڈاکٹر عارف علوی اختتامی سیشن دی صدارت کریسن۔ کانفرنس اچ پورے ملک توں شخصیات، علمائے کرام، مشائخ عظام اتے سکالرز کوں دعوت ڈتی ویندی پئی اے ۔ وزارت مذہبی امور دے مطابق اجوکے سال کانفرنس اچ سعودی عرب، ایران، مصر، عمان، عراق، تیونس اتے شام توں علماءاتے وفد کوں سڈیا گے ۔
