اسلام آباد ۔ 25 دسمبر (اے پی پی) وزیراعظم دی معاون خصوصی برائے اطلاعات و نشریات ڈاکٹر فردوس عاشق اعوان 2020 کوں ملک دی تعمیرو ترقی، معاشی استحکام اتے ریلیف دا سال قرارڈیندے آکھیے جو وزیراعظم عمران خان 23سال مسلسل جدوجہد دے بعد پاکستان کوں استحکام پاکستان دے رستے تے سٹ ڈتے،2020ءوزیراعظم دی اگوانڑی اچ معاشی استحکام دے ثمرات عوام تئیں پچاونڑ دا سال ہوسی۔ اے گالھ معاون خصوصی اطلاعات و نشریات ڈاکٹر فردوس عاشق اعوان قومی خبر رساں ادارے اے پی پی دی انعام ونڈنڑ دی تقریب نال خطاب اچ آکھی۔ سینیٹ دی قائمہ کمیٹی برائے اطلاعات ونشریات دے چیئرمین سینیٹر فیصل جاوید، ایم ڈی اے پی پی ڈاکٹر طارق محمود خان، پی آئی او رائے طاہر حسن، ایگزیکٹو ڈائریکٹر غواص خان، نیشنل پریس کلب دے صدر شکیل قرار،پی ایف یو جے دے سابق صدر افضل بٹ وی تقریب اچ موجودہم۔ ڈاکٹر فردوس عاشق اعوان قائداعظم محمد علی جناح دے جمنر ڈینھ اتے جگ دی مسیحی برادری کوں کرسمس دی مبارکباد ڈیندے آکھیا جو قائداعظم محمد علی جناح دی ویژن دے مطابق اجوکی حکومت خاص کر وزیراعظم عمران خان پورے عزم نال پاکستان اچ اقلیتاں کوں تحفظ اتے بنیادی حقوق ڈیونڑ تے کم کریندے پین،ملک اچ چنگائی کیتے ہر سطح تے اداری جاتی اصلاحات جاری ہین،اج دا ڈینھ بہوں اہم اے،جیویں قائد جیویں ہک عزم نال ناممکن کوں ممکن بنڑائے اوویں عمران خان وی قیام پاکستان کوں استحکام پاکستان دو ٹورنڑ اچ کامیابی ڈکھائی اے،عمران خان قانون دی حکمرانی، میرٹ دی بالادستی اتے قائد دے حقیقی پاکستان کیتے روایتی سیاسی ڈھانچے کوں لت مار تے مٹا ڈتے اتے لٹ مار دی سیاست کرنڑ آلیاں کوں وی دفن کرڈتے،جیکر عمران خا ن ذات کیتے سیاست کرنڑی ہوندی تاںا ٓرام نال بہہ تے پنج سال گذارن ہا بھل او قائد دے پاکستان دے خواب دی تعبیر کیتے ڈینھ رات محنت کریندے پین کیوں جوا عوام انہاں چنڑیا ہی خدمت کیتے اے،خوشی اے جو حقیقی تبدیلی دا آغاز قومی خبر رساں ادارے اے پی پی توں وی تھی چکیے،جیڑھے معاشرے توں جزا اتے سزا دا عمل مک ونجے او معاشرہ اپنڑی سنجانڑونجا باھندے۔
