اسلام آباد ۔ 9 دسمبر (اے پی پی) وزیراعظم عمران خان آکھیا جو کرپشن دے خلاف جہاد اچ پوری قوم نال تھیوے،ماضی اچ او پیسہ جیڑھا عوام تے خرچ تھیونڑاں ہئی او منی لانڈرنگ نال باہرلے ملک گھن ونج تے محلات بنڑائے گئے،کک بیکس اتے کمیشن سانگے ایجھے منصوبے شروع کیتے گئے جنہاں دی لوڑھ ای کائنا ہئی ،کرپٹ قوماں کڈاہیں ترقی کائنی کریندیاں۔اے گالھیں انہاں سنوار کوں انسداد بدعنوانی دے عالمی ڈینھ دے موقع تے پنجاب حکومت ولوں اینٹی کرپشن ایپ دی افتتاحی تقریب نال خطاب کریندیں ہوئیں آکھی۔وزیراعلیٰ پنجاب سردار عثمان بزدار، وزیراعظم دے معاون خصوصی برائے اطلاعات تے نشریات ڈاکٹر فردوس عاشق اعوان، وزیراعظم دے معاون خصوصی برائے احتساب تے داخلہ شہزاد اکبر وی ایں موقع تے موجود ہن۔وزیراعظم عمران خان ایں موقع تے آکھیا جو پنجاب دی حکومت اینٹی کرپشن ایپ شروع کر تے بہوں وڈا کم کیتے،انہاں وزیرااعلیٰ پنجاب کوں ہدایت ڈتی جو او پنجاب حکومت دی کارکردگی بارے عوام کوں ڈساون۔انہاں آکھیا جو اینٹی کرپشن132ارب روپے دی اراضی چھڑوائی اے اتے بے ایمانی اچ ملوث ڈو ہزار بندیاں کوں پکڑ گھدے۔انہاں آکھیا جو 32ہزار شکایتاں دا ازالہ کیتا گئے ،اینٹی کرپشن پنجاب اچ گھٹ عرصے اچ 10انکوائریاں پوری کیتن،عوام بے ایمانی دے خلاف اپنڑی شکایتاں درج کراون تانجو انہاں دا ازالہ تھی سگے۔انہاں آکھیا جو بے ایمانی ہوسی تاں معاشرہ ترقی کائنا کریسی،نہ کرپشن کریسوں اتے نہ کہیں کوں کرنڑ ڈیسوں،کرپشن دے خلاف جہاد جاری رکھیسوں۔
