مسقط۔ 14 جنوری (اے پی پی) وزیر خارجہ مخدوم شاہ محمود قریشی آکھیے جو پاکستان دی حکومت تے عوام اومان دے مرحوم سلطان قابوس دے انتقال تے ڈکھی اے تے انہاں دے ڈکھ اچ برابر دی شریک اے ، مرحوم سلطان قابوس ہک زیرک ، مدبر اتے امن پسند حکمران دے طور تے جانڑیے ویندے ہن ۔اے گال انہاں سلطنت اومان دے نویں حکمران سلطان ہیتھم بن طارق السید نال ملاقات کریندے ہوئیں آکھی اے ۔ وزیر خارجہ صدرپاکستان، وزیر اعظم عمران خان اتے پاکستانی عوام ولوں انہاں دے پیش رو سلطان قابوس بن سید دے انتقال تے اظہار تعزیت کیتے۔ وزیر خارجہ آکھیے جو پاکستان دی حکومت تے عوام اومان دے مرحوم سلطان قابوس دے انتقال تے ڈکھی تے انہاں دے ڈکھ اچ برابر دی شریک اے ۔ انہاں آکھیے جو انہاں دے دور حکومت اچ اومان مثالی ترقی کیتی۔ سلطان قابوس دے دنیا توں رخصت تھیونڑنال سلطنت اومان ہک ہر دلعزیز لیڈر اتے پاکستان ہک مخلص، بااعتماد اتے پرخلوص دوست توں محروم تھئے ۔ وزیر خارجہ مرحوم سلطان قابوس دی مغفرت اتے اچے درجے کیتے دعا کیتی ۔ سلطان ہیتھم وزیر خارجہ مخدوم شاہ محمود قریشی دی آمد اتے تعزیت دا شکریہ ادا کریندے ہوئیں یقین ڈیوایا جو اومان دی حکومت مرحوم سلطان دے زریں اصولاں کوں مشعل راہ بنڑیندے ہوئیں امن تے سلامتی دے ودھارے کیتے کوشاں رہسی ۔ سلطان ہیتھم بن طارق السید ایں عزم دا اعادہ کیتا جو آندے ڈینھاں اچ اومان تے پاکستان وچال تعلقات مزید ودھسن ۔
