اسلام آباد ۔ 9 جنوری (اے پی پی) وزیراعظم عمران خان کامیاب جوان پروگرام دے تحت” ہنر مند پاکستان پروگرام“دے پورٹل دا افتتاح کر ڈتے جیندے کیتے تقریب کنونشن سنٹراسلام آباد اچ تھئی۔پروگرام دے تحت پہلے مرحلے اچ 20 مہینے اچ ہک لکھ 70 ہزار نوجوانواں کوں پیشہ ورانہ تربیت ڈتی ویسی ۔پروگرام کیتے 30 ارب روپے دا پیکج رکھیا گئے جیندے تحت پنج لکھ نینگر ہنر مند بنڑسن۔پروگرام دے پہلے مرحلے اچ 10 ارب روپے لا تے پنج سو ٹیکنیکل ٹریننگ سنٹر کھولیے ویسن اتے ہک لکھ 70 ہزار نوجوانواں کوں ہنر مند بنڑایا ویسی اتے مدارس اچ ہنر دے 70 تربیتی مراکزبنڑسن ۔ایندے نال 300 سمارٹ ٹیکنیکل مراکزبنڑا تے انہاں کوں انٹرنیشنل کوالٹی ٹیکنیکل انسٹی ٹیوٹ نال رلایا ویسی جیندے کیتے 75 سمارٹ ٹیکنیکل مراکز قائم کیتے ویسن۔نوجوان آن لائن پورٹل دے ذریعے 24 جنوری تئیں مختلف شعبیاں اچ داخلے کیتے درخواستاں ڈے سگدن۔داخلہ فارم کامیاب جوان پروگرام دی ویب سائٹ www.kamyabjawan.gov.pk تے موجود ہن۔
