اسلام آباد ۔ 11 فروری (اے پی پی) وزیر اعظم عمران خان آکھیے جو حکومت کاروباری طبقے کوں ساریاں سہولتاں اتے سوکھ ڈیونڑ داعزم رکھیندی اے،سیاحت دے ودھارے نال زرمبادلہ،روزگارودھاونڑ اتے معیشت تکڑی کرنڑ اچ مدد ملسی۔اے گالھ وزیر اعظم عمران خان میکنزی دے گلوبل منیجنگ ڈائریکٹر کیون سنیدرنال ملاقات اچ گالھ مہاڑکریندے آکھی۔ملاقات اچ وزیر اعظم دے مشیر محمد شہزاد ارباب، وزیر خزانہ خیبر پختونخوا تیمور سلیم خان جھگڑا، چیئرمین سرمایہ کاری بورڈ سید ذوالفقار حیدر گیلانی وی موجود ہن۔ وفد وزیرِ اعظم کوں مختلف شعباں اچ منصوبہ بندی اتے انتظامی امور اچ تجویزاں،آراءاتے معاونت بارے بریفنگ ڈتی۔میکنزی کمپنی کئی سال توں پاکستان اچ خدمات سرانجام ڈیندی پئی اے تاں جو عوامی مفاددیاں پالیسیاں بنڑاونڑاتے بہتر انتظام یقینی بنڑایا ونج سگے۔وفد نال الیندے وزیرِ اعظم آکھیا جو حکومت دی اولین ترجیح کاروباراچ سہولت کاری اتے سیاحت دا ودھارا اے،اگیں حکمراناں اپنڑے مفادات کیتے کرپشن کیتی اے اتے اداریاں کوں کمزورکیتے،بھل اجوکی حکومت ملک دی معاشی صورتحال سانگے کاروباری طبقے کوں ہر ممکن سہولت ڈیونڑ دا عزم کیتا ہویا اے تاں جو سماجی و معاشی ترقی ممکن تھیوے۔وزیرِ اعظم آکھیا جو پاکستان اچ سیاحت دی ودھ صلاحیت موجود اے ایندے نال زرمبادلہ کماونڑ،نوجواناں کوں نوکریاں ڈیونڑدے موقع نکلسن ،حکومت انفراسٹرکچر دے قیام، مقامی اقدار دے مطابق سیاحت دا ماحول اتے سہولتاں ڈیونڑ سانگے میکنزی دی ماہرانہ رائے دا خیر مقدم کریسی۔ ملاقات اچ حکومتی شعبے دے اخراجات گھٹاونڑ،سرکاری پیسے دے استعمال اچ بچت اتے ایندا بہترین استعمال یقینی بنڑاونڑ تے وی الایا۔
